Bizkaiko Foru Aldundiak ohartarazi du herritar batzuek iruzur mezuak jaso dituztela. Mezu horiek Foru Ogasunaren izenean heldu zaizkie, eta BEZari lotuta daude. Foru aldundiak eskatu du ez sartzeko mezu horietara eta ez irekitzeko mezuan dauden loturak. Datu pertsonalik eta bankuko daturik ez emateko ere eskatu du.
Mezu horien goiburuan «BEZaren egiaztapen mugatua - 2024ko ekitaldia» dago idatzita. Testuan, BEZaren aitorpenetan dauden okerrei buruzko ustezko abisuak agertzen dira. Gainera, esteka batera sartzeko eskaera egiten diote hartzaileari, zabalduko zaion lekuan bere aitorpena zuzena izan dela frogatuko luketen agiriak igo ahal izateko.
Diputazioak esan du ez duela inoiz posta elektriko bidez informaziorik edo dokumentaziorik eskatzen —ez norbanakoena, ez enpresena—. Gainera, ez du bidaltzen estekarik herritarrek datuak eman ditzaten. Ogasunarekin lotutako izapide guztiak soilik leku ofizialetan egiten direla gogoratu du.
