Ibarrekolandan egingo dute Deustuko suhiltzaile parke berria. Datorren astean hasiko da Bilboko Udala hura eraikitzen, eta 28 hilabetean bukatzea espero du. Hala, 2028an hartu ahal izango dio lekukoa gaur egun Deustuko zubipean dagoen parkeari. Horretarako 13,2 milioi euro pasatxoko inbertsioa egingo dute.
Eraikin «modernoa, funtzionala eta eraginkorra» izango da, udalaren arabera. 1.930 metro koadroko eremua beteko du. Itsasadarreko pasealekutik sarbidea izango duen lurpeko solairua, beheko solairua eta lehen solairua izango ditu eraikinak. Entrenamenduetarako dorreak, berriz, bost solairu izango ditu.
Kanaletik sartuta, aldagelak, biltegiak, atsedenerako gelak, gimnasioa eta prestakuntza gelak egongo dira. Morgan kaletik sartu ahal izango da beheko solairura, atari nagusitik. Han egongo dira, besteak beste, jantokia, garajea eta maniobra gunea. Lehen solairua administraziorako eta bileretarako erabiliko dute.
Entrenamendu dorrea prestakuntzarako eremu moldagarria izango da. Solairu bakoitzean hainbat etxebizitza mota birsortuko dituzte, suhiltzaileak askotariko egoerei aurre egiteko prestatu ahal izateko.
