Gaur hasi eta otsailaren 13ra bitartean, Bizkaiko 1.600 abeslari igaroko dira Bilboko Begoñako basilikatik. 52. Bizkaiko Abesbatzen Astean herrialde historikoko 38 herritako 56 abesbatzak kantatuko dute. Kontzertuak astegunetan izango dira, 20:00etan. Salbuespen bakarra egongo da: otsailaren 4an, Santa Ageda bezperan, ez da emanaldirik egongo, abesbatzak santa eskean ibiliko direlako, zein bere auzoan edo herrian. Sarrera doakoa da.
Besteak beste, Barakaldoko Schola Cantorum, Mungiako Jose Maria Arregi abesbatza, Durangoko eta Sestaoko orfeoiak eta Bilboko San Anton korala entzuteko aukera egongo da hiru asteotan. Jaialdiaren webgunean dago egitarau osoa. Gizon eta andreen presentzia orekatua den arren, emakume abeslariak apur bat gehiago izango dira. Parte hartuko duten koruetatik 38tan ahots mistoak entzun ahal izango dira, bostetan ahots zuriak, eta hamahirutan ahots lodiak.
