Azken urteetan hazi eta hazi ari da zerga bilketa Bizkaian, eta iaz, lehenengoz, 10.000 milioi euroren langa gainditu zen. Zehatz esanda, 10.442,0 milioi euro garbi bildu zituzten, 2024an baino %11 gehiago. Foru Ogasunak egindako aurreikuspena baino zertxobait gehiago bildu zuten, gainera: %102,5 bete da 2025erako aurreikusitako aurrekontua. Batez ere, PFEZren eta BEZaren bidez bildutakoak izan duen hazkundeak eragin du goraka.
PFEZ bidez bildutakoa %15,6 hazi zen iaz; batez ere, lanaren eta kapital higiezinaren errenten gaineko atxikipenen igoeraren ondorioz —hurrenez hurren, %6,1 eta %7 hazi ziren—. Zuzeneko zergen bidez bildutako 5.324,6 milioi euroetatik 4.135,8 bildu zituzten PFEZ bidez. Hazkundea egon da, halaber, ondarearen gaineko zergan (%22,4), ez-egoiliarren errentaren gaineko zergan (%12,5) eta oinordetzen eta dohaintzen gaineko zergan (%45,4). Ostera, sozietateen gaineko zergaren bidez, 2024an baino %25 gutxiago bildu zuen Foru Ogasunak. Iaz ere behera egin zuen, 2023arekin alderatuta.
Zeharkako zergen bidez, 3.769,2 milioi euro bildu dituzte, 2024an baino % 11,7 gehiago. Horietatik 3.193,9 milioi euro BEZari dagozkio; 2024an baino %16,7 gehiago bildu dute. Diputazioak kudeatzen ez dituen zerga ez-zuzen batzuetan ere izan dira hazkundeak bilketan; esaterako, elektrizitatearen gaineko zergaren bitartez %43,8 gehiago bildu dute. Ostera, alkoholaren, garagardoaren eta garraiobideen gaineko zergen bidez, gutxiago bildu dute.
