Gabonetako oporretatik bueltan, urte berriko egutegiak estreinatzen dituzte ikasgeletan. Bilboko ikastetxe publikoetan egutegi berezi bat jaso dute 2026ko hasiera honetan, Sehaska elkarteak oparituta; LGTBI kolektiboko familiek osatzen dute elkarte hori. Hilabeteak ilustratzen dituzten irudiak Sehaskako kide diren familietako 4 eta 12 urte arteko umeek egin dituzte, haien familiak zelakoak diren erakutsiz: aita bikoak, ama bikoak edo guraso bakarrekoak. Helburua da hiriburuko 33 eskola publikoetan familia ereduen aniztasuna landu ahal izatea. Bilboko Udalak lagundutako egitasmoa da.
Sehaskak gura du ikastetxeek familia ereduen inguruko lanketa egitea ikasgeletan. «Duten familia dutela ere umeak eroso eta aske sentituko diren ingurua izan behar da eskola», adierazi du Sehaskako presidente Pablo Bilbaok. Izan ere, ikasleek ezagutzen dituzten familia ereduak aita batek eta ama batek osatutakoak izaten dira, gehiengoa baitira ikastetxeetan, zineman, literaturan eta beste hainbat esparrutan.
LGTBI kolektiboko familietako umeek ere aita eta ama batek osatutako familiak baino ez dituzte izaten eredu modura, Bilbaoren esanetan. Hori aldatzea da kanpaina honen helburua. «Badakigu gure familiak ia ikusezinak direla gizartean; horregatik, ezinbestekoa iruditzen zaigu eskoletan ikusgarri bihurtzea, LGTBIQ+ komunitateko familien bozgorailu izatea eta ahalduntzea, gizartean ere geure lekua izan dezagun».
