Tula Laikak bost urte, eta behar ekonomikoa beti hor

Balentria «ederra» kausitzen du Tula Laikak, Jean Claude Agerre Seaskako guraso eta antolatzailearen hitzetan. Bi mila lagunetik gora biltzen dira Pagolan, Zuberoako ikastolak eta Larzabaleko Manex Erdozaintzi Etxart kolegioa laguntzeko antolatzen duten bestan. Bosgarren aldia izanen da aurtengoa, baina jadanik «usantza» bilakatua dela argi du Agerrek. Hainbat hobe, zeren eta Seaskak ekarpen ekonomiko hori «beharrezkoa» baitu oraino ere. Igande honetan izanen da, 10:30etik goiti. Niko Etxart eta Hapa Hapa, RTZ, Xabi Solano, Xistor Of A Down eta DJ Infernu ariko dira oholtzan, arratsaldean.

Sohütako Epherra eta Alozeko Basabürüa ikastolak eta Larzabaleko kolegioa ekonomikoki sostengatzeko balio du egunak, bai, baina hortik haratago doa betetzen duen funtzioa: «Euskarari eta euskal kulturari leku bat eskaintzea ere bada gure xedea. Halako egun eta egitasmoek, izan Herri Urratsek, izan Korrikak edo izan beste hainbatek, euskara eta euskal kultura biziarazten dituzte», Agerren arabera. Horretarako eskaintza «oparoa» egin nahi izan dute antolatzaileek, eta, kontzertuez gain, familiei zuzendutako eskaintza bat ezarri dute plantan, egun osorako.

Eguna hasteko, bertso pilota eginen dute, 10:30ean, trikitilariek lagundurik. Ondotik, inguruko herrietako dantzariek hartuko dute plaza: Oztibarreko Bunuztar Xoriek, Txingili’K taldekoek eta Zümatzeko maskaradako aitzindariek. «Musikagintza bezala, gure kulturaren parte diren beste diziplinak ere aitzinera eraman nahi ditugu. Iaz, antzerkiari egin genion leku berezia, eta aurten, dantzari eta kantagintzari», erran du Agerrek. 

«Beren eguna» ere badela senti dezaten, preseski, aipatutako ikastetxeetako ikasleek urte osoan landu dituzten proiektuen inguruan pentsatu dute programa antolatzaileek. Euskal kantagintza landu dute aurten. «Anje Duhalderekin lan berezi bat egin dute aurten bere kantagintza ezagutzeko, eta harekin kantatu zuten Donibane Lohizunen, martxoan. Kontzertua errepikatu nahi zen Maulen, baina ez da egin ahal izan, arrazoi ekonomikoengatik. Dena dela, gure kantu katalogoan sartzen diren ikono batzuk ezagutzeko parada izan dute haurrek, eta Pagolan Niko Etxart ikusten ahalko dute. Gure historiaren ondare inportante bat da», zehaztu du Agerrek.