Atxondoko I. Mendi Asteburua ate joka ari da. Aurten Sorginen Lasterketa eta Anboto Kilometro Bertikala asteburu berean batu dituzte antolatzaileek, eta egitaraua bestelako ekitaldiekin osatu dute.
Anbotoko Kilometro Bertikalak 16. aldia izango du larunbatean. 10:00etan hasiko da proba, Arrazolan. Parte hartzaileek Anbotoko tontorreraino igo beharko dute biderik laburrenetik, 3,9 kilometroan 1.092 metroko goranzko desnibela gaindituta. Igoerako errekorrak Marco de Gasperi italiarrak (37.14) eta Oihana Azkorbebeitia abadiñarrak (45.59) dituzte.
Igandean Sorginen Lasterketak hartuko du lekukoa, Axpen. Aurten bada berrikuntza nagusi bat: lasterketa luzeaz gainera (22 km), laburra ere antolatu dute lehenengoz. Laburrak 11,6 kilometro eta 890 metroko desnibela izango ditu. Biak Euskal Herriko Koparako puntuagarriak dira: luzea, nagusietan, eta laburra, gazte mailetan. Aurten ere Etiketa Berdearen zigilua du lasterketak.
Hitzaldiak, emanaldiak eta gehiago
Egitaraua ez da lasterketetara mugatuko. Ostiralean hitzaldi bana emango dute Garazi Abasolo nutrizionista eta korrikalariak eta Itsasne Blanco kirol psikologoak Apatako eskolan. Larunbatean, berriz, Mattin Iñiguez parapentelariak X-Alps lehiaketako irudiekin egindako film laburra emango du.
Umeei begira, Zintzilik enpresak tirolina eta ekintza gehiago antolatuko ditu Apatako frontoian.
Atxondon asteburu-pasa ibili nahi dutenentzat, antolatzaileek furgonetetarako eta autokarabanetarako gune bat egokituko dute Apatako eskolako patioan. Ostiralean 17:30etik aurrera egongo da erabilgarri. Bertako komunak ere erabili ahal izango dira. Eta lasterketa egunetan doako garraio zerbitzua eskainiko dute gune horretatik Arrazolara eta Axpera, partaideentzat eta proba ikustera joan nahi dutenentzat.
