300 preso inguru hil dira Hondurasko kartzela batean sutea izan ondoren. Comayagua hiriko kartzelan izan da sutea, Ramon Custodio Nazioarteko Giza Eskubideen mandatariaren arabera. Oraindik ez dago hildakoen datu zehatzik; uste da desagertuta daudenetako batzuk ihes egitea lortu dutela.
Goizaldean piztu da sua, 04:55ean (Hondurasen 22:55ak ziren), eta inguruko ospitaleetara "hamarnaka zauritu" eraman dituzte.
Custodioren arabera, 853 preso zeuden kartzelan, eta horrek "kartzelaren edukiera gainditzen" duela azaldu du.
Kartzela kanpoaldean istiluak izaten ari dira herritarren eta segurtasun indarren artean.
Porfirio Lobo Hondurasko presidenteak kargutik kendu ditu espetxeko arduradunak.
