Bashar Al Assad Siriako presidenteak amnistia osoa eman du gaur, Sana herrialdeko agentzia ofizialak jakinarazi duenez. Aurtengo ekainaren 20ra arte egindako delituei eragiten die neurriak.
Atzo, berriz, abuzturako konstituzioa aldatu eta parlamenturako hauteskundeetara deituko duela adierazi zuen presidenteak. Martxan den erreforma prozesua ere azpimarratu zuen Al Assadek, eta “moteldu den arren” ez dela gelditu esan du. Erreformen artean da 1963tik indarrean den Larrialdi Egoeraren amaiera ere.
Azkeneko hilabetean herritarrak haren erregimenaren aurka egiten ari dira, eta ehundaka lagun hil dira. Herrialdearen krisia “nazioarteko konspirazio” baten ondorio dela uste du Al Assadek, eta krisiaren “benetako arduradun talde armatuak, autoritateek bilatutako gaizkileak eta pentsamendu islamiko erradikaleko taldeak” direla.
