Txinak bere burua munduan ezagutzera emateko, gauza garrantzitsu bat falta izan da: soft power edo botere leuna esaten diotena, hain zuzen ere. Kulturaren bidez edo mundu osora saltzen diren produktuen bidez herriaren zeharkako boterea areagotzea. Ameriketako Estatu Batuek hori oso ondo egin dute: pelikula eta telesailen bidez batez ere, baita autoen, mugikorren, edo musikaren bidez ere… hamarkadetan, pixkanaka, mundu osoan Ameriketako Estatu Batuak hain urrun ez dauden sentsazioa sortu da. Eta soft power horren bidez, arerioen irudia ere okertu dute, Ameriketako Estatu Batuetako komunitate txinatarrek gero eta gehiago salatzen dute Ameriketako Estatu Batuetako telesail eta pelikuletan behin eta berriz gizagabetu eta kritikatu dituztela.
Txinak ez du horrelako estrategia bat erabili; gainera, distantzia kulturalaren eta hizkuntza oso desberdinaren pertzepzioa dute Europan; azkenean, Txina urrunegi dagoen sentsazioa barneratu da. Baina hori aldatzen ari da pixkanaka: teknologia berrien arloan Txinako produktuak merkeak diren ideia aldatu du, eta orain kultura garaikidearen esparruan ere pauso oso garrantzitsuak ematen ari dira. Aurten, bi dira arrakastaren adibide nagusiak: batetik, Black Myth: Wukong bideojokoa; eta, bestetik, Labubu panpina munstroa.
'Wukong', tximu erregearen kondaira
Game Science enpresa txinatarrak garatutako bideojoko honek Sun Wukong edo Errege Tximinoaren kondaira klasikoa ikus-entzunezko esperientzia moderno bihurtu du. Mendebalderako bidaia Txinan denek ezagutzen duten istorio klasikoa da; Mendebaldean, aldiz, oso gutxik ezagutzen zuten, baina orain hori aldatzen ari da.
Bideojoko honen trailerra 2020an zabaldu bezain laster, bere grafiko hiperrealista eta borroka sofistikatuekin munduaren arreta erakarri zuen, eta egun gutxitan gamer komunitatean nazioarte mailan milioika jarraitzaile lortu zituen. 2025eko abuztura arte ez dute kaleratuko, baina aurresalmentetan arrakasta izugarria lortu du: plataforma nagusietan lehen postuetan egon da, eta lehenengo asteetan hamar milioi kopia saldu dira. Arrakastaren gakoa kontrastean egon da: alde batetik, musika eta kontakizunak Txinako aspaldiko ipuinetan oinarrituak daude; baina, bestetik, grafiko hiperrealista modernoak eta ikuspegi unibertsal bat erabili dituzte jokoa garatzean.
Wukong-ek bideojokoen sektorean Txina lehen lerroan jarri du; azken urteotan sektore hau asko garatzen ari da (1.800 milioi dolar 2013an, eta 16.300 milioi dolar 2023an), eta orain Wukong-ekin are bultzada handiagoa jasoko du Txinako bideojokoen munduak.
'Labubu' munstro panpina
Bigarren adibidea Txinako Pop Mart enpresaren panpina bat da. Enpresa horren irabaziek %726ko gorakada izan zuten 2024an, dena Labubu izeneko panpina munstroari esker.
Produktu merkeak esportatzen zituen fabrika izatearen iragan hori oso atzean geratu da; orain, Txina sormen industrietan ere lidergoa bilatzen ari da, eta arrakastatsu.
Labubu hortz zorrotzak, belarri luzeak eta irribarre bihurria duen munstroa da; sortzailearen arabera, bihotz onekoa da, baina dena aldrebes egiten du. Panpina hau sortu zuen marrazkilariaren mezu nagusia unibertsala da: desberdina izatea ez dela ahulezia, indar iturria baizik. Panpina hau batzuentzat polita da; beste batzuentzat, itsusia, baina, gehienentzat, badu xarma berezi bat. Txinako kulturako elementuak hartu eta Mendebaldean arrakasta handia duen creepy-cute joera horrekin nahastu dute. Horrela, hainbat belaunalditan eta herrialdetan enpatia eragin du.
2024an, panpina horren modelo desberdinekin Pop Mart marka txinatarrak 363 milioi euroren irabaziak izan zituen; aurreko urtean baino %726 gehiago. Gainera, irabazien ia erdiak (%40) esportazioetatik datoz.
Pop Mart enpresak Hong Kongeko Kasing Lung artistari 2019an bere The Monsters izeneko unibertsoko protagonistaren eskubideak erosi ondoren, munstro txikiak iraultza sortu du. Panpina horri esker, munduan 500 denda eta 2.000tik gora robot denda ditu orain Pop Martek.
Panpinaren diseinuaren arrakastaz harago, Pop Martek ere jakin du marketin ona egiten: Txinak sarritan egiten duen bezala, teknika berritzaileak erabili ditu menpekotasuna eragiteko, adibidez blind box edo kaxa itxuraren kontzeptua: panpina kaxa itxi batean saltzen dute, eta, horrela, bezeroak, ireki arte, ez daki Labubu-ren zein modelo tokatu zaion. Bestalde, Tiktoken fenomenoa dago, noski; Rihanna bezalako artisten bidez, Labubu sare sozialetan birala egin da. Atzerriko denda askotan panpina agortu da, eta erosteko ilara luzeak sortzen dira bai Txinan eta bai kanpoan.
Bi adibideek erakusten dute Txina dagoeneko ez dela bere produktua esportatzearekin konformatzen, bere iruditeria propioa nazioartera ere eraman nahi duela baizik. Produktu merkeak esportatzen zituen fabrika izatearen iragan hori oso atzean geratu da; orain, Txina sormen industrietan ere lidergoa bilatzen ari da, eta arrakastatsu.
