Forsmarko erreaktoreak, itxura denez, zentralean jazotako zirkuitu labur baten ondorioz itxi zituzten. Arazo horrek eragin duen arriskua 0-7 arteko eskalan bikoa dela esan dute SKI Suediako Indar Nuklearreko Ikuskaritzako adituek. «Ez dago hondamendi arriskurik», zehaztu du Anders Bredfellek, erakundeko bozeramaileak. Planta hozteko sistemak lanean jarraitzen duela gogorarazi du, eta kale egingo balu ere larrialdietarako sistema badutela, gas turbinen bidezkoa.
Nolanahi ere, Forsmarko zentralean zer jazo zen aztertu ondoren, lehengo larunbatean SKIk dei egin zien herrialdeko gainerako zentral nuklearretako arduradunei ere, eta Forsmarken jazo zena beren zentraletan ere gerta zitekeen aztertzeko eskatu zieten. Eta azterketa horren ondorioz erabaki zuten atzo Oskarshamneko arduradunek bi erreaktoreren jarduna etetea. «Izan ere, ezin izan da frogatu bertan gauza berbera ezin dela gertatu», azaldu du Bredfellek.
Forsmarken zirkuitu laburraren ostean egin ziren urratsak gertutik jarraitu ditu SKIk, eta zentraleko arduradunek behar bezala jokatu zutela argudiatu du. Forsmarkeko erreaktoreen etenaldia noiz artekoa izango den esatera ez da ausartu: «Ez dakigu noiz arte egongo diren horrela».
ALTERNATIBA BILA. Suedian egitasmo zabala dute datozen urteotan apurka-apurka energia iturri berri eta garbiak bilatzeko eta garatzeko. Petrolioaren kontsumoan oinarritzen den eskematik haratago jardun nahi dute. «Petrolioarekiko dependentzia 2020rako hautsiko dugu», aurreikusizuen urte hasieran Garapen Iraunkorraren ministroak, Mona Sahlinek. Eta zentral nuklearrak ere pixkanaka geratzen joatea da helburua.
Egunotako segurtasun arazoek izan duten oihartzunaren harira, Suediako Greenpeacek herrialdeko zentral nuklear denak ixteko eskatu dio Suediako Gobernuari.
Greenpeacek Espainia kritikatu du
a.iKataluniako Vandellos II zentral nuklearrari Espainiako Industria Ministerioak jarri berri dion zigorra «huskeria» dela gaitzetsi du Greenpeace erakunde ekologistak. 1,6 milioi euroko zigorra da --hiru isunetan banatuta--, Espainiako agintariek inoiz jarritako handiena, baina Greenpeaceren aburuz, txikia. «Oso merkea aterako zaie isuna Endesa eta Iberdrola konpainiei». Zentralak zortzi hilabetez segurtasun arauak bete gabe jardun zuela gogorarazi dute erakundeko ekologistako kideek. «Eta isuna ez da Vandellos IIko jabeek zortzi hilabete horietan izan zituzten irabazien %1a ere».
2004ko abuztuan istripua gertatu zen zentral nuklear horretan, baina hori konpontzeko urratsak desegokiak egin zituztela ondorioztatu du Industria Ministerioak, eta horregatik ezarri dio zigorra. Zigorrak ezartzeko sistema okerra dela salatu du, ordea, Greenpeacek, eta lehenbailehen aldatzeko eskaria egin du. «Betiere, jartzen diren isunak izan bitez arauak apurtuz lortu diren irabazien adinakoak».
Zamoran ere (Espainia) bizi-bizi dago zentral nuklearren gaineko eztabaida. Peque udalerriko alkateak herria eskaini du bertan hondakin erradiaktiboen biltegi zentralizatua egiteko. Baina ez dirudi proposamenak aurrera egingo duenik. Herritarrek kalera egin dute protestan, eta Zamorako PPko eta PSOEko zuzendaritzek proposamenari ezezkoa emango diotela jakinarazi dute. Inguruko alkate asko ere aurka azaldu dira.
