Ustez jabetza pribatu batean zeuden 150 familia indigena etxegabetzen ari ziren segurtasun indarrei aurre egiteagatik hil dute Nelson Garcia buruzagi indigena. Poliziako iturriek adierazpen ofizialik egin ez duten arren, Copinh Herri Indigenen Erakundeen Hiritar Batzordeak egin du salaketa. Haren arabera, 38 urteko ekintzaileak aurre egin zien indigenak "indarrez" kanporatzen ari ziren segurtasun indarrei, eta haiek tiroka erantzun zioten.
Ez da hamabost egun ere igaro, beste buruzagi indigena bat hil zutela. Berta Caceres La Esperanzako bere etxean hil zuten. Komunitate lencako eta nekazari mugimenduetako buru zen, eta giza eskubideen defendatzailea ere bai. Caceresek berak komunitate indigena horretako buru ugariren hilketak salatu zituen.
