George Bush AEBetako presidenteak iragan astean iragarri zuen estrategiaren harira, egoerak «laster» hobera egin dezan espero du lehen ministroak: «Hiru eta sei hilabete arteko epean laguntza gutxiago beharko dugula uste dut, beti ere, gure indarrak sostengatzeko benetako ahalegin irmoa egiten bada».
Al Malikik bere kontrako «kanpaina mediatikoa» salatu zuen. Etxe Zuriaren kritikak ere ez ditu ongi jaso. Condoleezza Rice AEBetako Estatu idazkariak Irakeko gobernuaren agintaldia «amaierako bidean» dela esan izana, esaterako, oso gaizki hartu du Al Malikik. «Niri iruditzen zaidana da, ostera, Washingtonen direla amaieratik hurbilen daudenak eta ez gu». AEBetan egin berri diren hauteskundeetan errepublikanoek izan duten porrota hizpide hartuta hauxe iritzi zion Al Malikik: «Bush presidentearen ahultasuna sekula ez dut horrenbeste nabaritu, zeren eta, egoera oso makalean utzi baitu orain dela bi hilabete izan ziren bozetan jasandako porrotak».
AEBek Irak «diktaduratik askatzeko» egindako ahaleginagatik, baina, ez diola inoiz eskerrak emateari utziko gaineratu zuen Al Malikik. Saddam Husseinen exekuzioa, haren biktimek ez zutela tratu bera jaso argudiatuz, justifikatu zuen.
Nazio Batuen Erakundeari berari ere kritikak bideratu zizkion lehen ministroak. Asteartean nazioarteko erakundeak argitara emandako hildako irakiarren inguruko txostena salatu zuen Al Malikik: «Datu hauek ez dira bat etortzen errealitatearekin, ez dira objektiboak eta bertako iturri ofizialez kanpokoak dira». Iraken iaz 34.452 zibilek bizia galdu zutela jakinarazi zuen NBEk. Irakeko Osasun Ministerioak, erietxeek eta gorputegiek emandako datuetan oinarrituta egin zuen txostena nazioarteko erakundeak.
LEHERKETA OLDEA BAGDADEN. Bagdaden, bestetik, sei bonba-autok eztanda egin zuten atzo. Orotara hogei lagun hil eta beste 54 zauritu ziren, gutxienez. Al Dura auzuneko azoka batean bakarrik hiru bonba-auto zartarazi zituzten hamar minutuko aldearekin -hamar lagun hil ziren-. Irakeko gobernuak duela hainbat aste iragarri zuen segurtasun plana aurki indarrean jarriko dela esan zuen Al Malikik: «Bagdaden tentsio handia dauden auzoetan ezarritako da plana eta irmoki egingo diegu aurre heriotzaren eskuadroiei». Azken hilabeteotan dozenaka mila lagunek, sunitak eta xiitak, ihes egin behar izan dute euren etxeetatik erasoak direla medio. Tigris ibaia, neurri batean, bi taldeen arteko banaketaren isla bihurtu da: sunitak mendebaldean eta xiitak ekialdean.
Bushen estrategiaren harira -21.500 soldadu gehiago bidaliko ditu Irakera-, bestetik, bi hautetsi demokratak eta errepublikano batek mozioa aurkeztu dute Senatuan -aurki eztabaidatuko dute auzia bertan-. Carl Levin eta Joseph Biden demokratek eta Charles Hagel errepublikanoak aurkeztutako testuak dio plana «interes nazionalen kontrakoa» dela. Segurtasunaren erantzukizuna «laster» irakiarren esku ezarri beharko litzatekeela iritzi diote senatariek. Tony Snow Etxe Zuriko eledunak, alta, presidenteak iragarritakoegitasmoak aldatzea baztertu zuen.
AEBek Kurdistanen atxilotutako irandarrak askatzeko bidean
Hil honen 11n AEBetako armadak Iraken menpeko Kurdistango Irbil hirian bahitu zituen bost irandarrak laster aske utziko dituzten ustea azaldu zuen atzo Bagdaden Teherango diplomazia buru Hassam Kazemik. «Hoshiar Zebarik [Irakeko Atzerri ministroa ] esan dit baikor zela etalaster askatuko dituztela». Bahiketa gogor gaitzetsi zuen, eta legezko lanean ziharduten diplomazialariak direla nabarmendu.AEBek azaldu zuten atxilotutako bost irandarrak Irakeko talde armatu xiitei armak hornitzeaz susmagarri zirela, baina Kazemik zera iharduki zuen: «Ager diezagutela, Iran Irakeko egoera kolokan jartzeko ahaleginetan ari dela dioen froga bakar bat». Halaber, Bagdadi laguntzeko prest agertu zen: «Ekintza terroristei aurre egiteko, Irakeko segurtasun indarrak trebatzen laguntzeko eta materialez hornitzeko prest dago Iran».
