Egiptoko presidentetzarako hauteskundeetan Abdel Fatah al-Sisi jeneral ohiak botoen %96,92 eskuratu dituela argitaratu du Al Ahram egunkariak: 23.851.364 boto, hain zuzen. Presidentetzarako Al-Sisirekin lehiatu den bakarra Hamdeen Sabahi ezkerreko hautagaia izan da, eta hark 756.619 boto jaso ditu, egunkariaren arabera. Parte hartzea %45 izan da.
Al-Sisiri mesede egiteko "Irregulartasunak" eta "faltsutzeak" izaten ari direla salatu dute, ordea, hainbat gazte mugimenduk. Hauteskunde Batzordeak botoa emateko egun bat luzatzea ere Al-Sisiren ahultasunaren adierazle dela adierazi dute.
Salatu dutenaren arabera, Hosni Mubarak presidente ohiari lotutako enpresari handi batzuek euren langileak behartu dituzte Al-Sisiren aldeko botoa ematera, "kaleratuak izateko mehatxupean". Mezkitak hauteskunde kanpainarako erabiltzea ere leporatu diote jeneral ohiari, eta gogoratu gauza bera egitea leporatu zietela Anaia Musulmanei duela bi urte.
