Irakurketa erraza da Kataluniakoa: prozesu independentista indartuta atera da Europako Legebiltzarrerako hauteskundeetan, ERC eta CiU geratu baitira lehen bi postuetan —CUP ez da aurkeztu boz hauetara—. Kataluniako Parlamentuan herrialdearen independentziaren aurka dauden hiru indarrek %30eko babesa baino ez dute bildu: PSCk, PPk eta Ciudadanosek.
Aldi berean, ERCk hauteskundeak irabazi izana ere azpimarratzekoa da, hauteskundeetan lehen aldiz nagusitu baita. Ez dio alde handia atera CiUri —46.000 botokoa—, CUPeko boto batzuk jasoko zituen oraingoan hain segur, baina sinbolikoki badu indarra lehen postu horrek. Kataluniako hurrengo bozetarako aintzat hartzeko datua izan liteke. 2012an hango legebiltzarrerako hauteskundeetan CiUk 50 parlamentari bildu zituen (%30,6, 1.112.000 boto), ERCk 21 (%13,8, 496.000 boto), CUPek 3 parlamentari (%3,4, 126.000 boto).
Katalunian ere Europako bozetako beste datu esanguratsu bat, Podemos hautagaitza berriarena: %6ko babesa. 117.000 boto.
ICV-EUiAk Kataluniako bozetan lortzen dituen antzeko emaitzak izan ditu, %10eko babesa erdietsita. Dena dela, duela bost urte Europako hauteskundeetan bildutako botoen aldean bikoitza erdietsi du, 258.000 boto.
2014-KO EMAITZAK KATALUNIAN (%99,99 zenbatuta)
ERC: 594.149 boto, % 23,6.
CiU: 548.718, %21,8.
PSC: 358.539, %14,2.
ICV-EUiA: 258.554, %10,3.
PP: 246.220, %9,8.
Ciudadanos: 157.873, %6,2.
Podemos: 117.096, %4,6.
UPD: 32.618, %1,2.
(...) EH Bildu-BNG: 7.402, %0,2.
Nabarmen egin du gora parte hartzeak Katalunian Europako Parlamenturako hauteskundeetan: %47,44 hauteslek eman dute botoa. 2009an %36,94 joan ziren bozkatzera.
2009-KO EMAITZAK KATALUNIAN
PSC: 708.888 boto, %36
CiU: 441.810 boto, %22,44
PP: 354.876 boto, %18,02
ERC: 181.213 boto, %9,2
ICV: 119.755 boto, %60,8
LV-GVE: 19.381 boto, %0,98
Iniciativa: 16.792 boto, %0,85
UPD: 15.720 boto, %0,8
