Errusia Ukrainako gerra harrotzeko beste urrats bat egitear egon da gaur. Ukrainako presidente Volodimir Zelenski eta Greziako lehen ministro Kyriakos Mitsotakis Odesan zeuden, konboietan. Errusiak eraso egin du buruzagiengandik gertu, droneekin: haiengandik 150 metrora, hain zuzen. Skai Greziako telebistak plazaratu duenaren arabera, zauririk gabe atera dira bi buruzagiak erasotik.
Greziako lehen ministroak adierazi du hiriko portuan zeudela, eta eraso bat gertu egon zitekeela jakin dutenean alde egin dutela, konboietan sartuz. Orduan heldu da droneen erasoa, Mitsotakisek esan duenez: «Zelenski bisita gidatu bat egiten ari zitzaigula Odesako portuan, sirena ahotsak entzun ditugu. Konboira igo bitartean heldu da eztanda».
Ukrainako gerra hasi zenetik, Odesa hartzea izan da Errusiaren helburu nagusietako bat. Gaur egun Kieven esku dagoen arren, ika-mikak etengabeak dira itsaso Beltzera ematen duen hiri hartan. Izan ere, Ukrainako presidentea jotzetik metro batzuetara egon diren droneena ez da izan gaur Odesan gertatu den eraso bakarra. Bi buruzagiak bilduta zeuden bitartean, misilak jaurti ditu Errusiak hiriaren aurka, Ukrainako eta Greziako hedabideek jakinarazi dutenez.
Bere herrialdearen babesa adierazteko bildu da Mitsotakis Zelenskirekin. Erasoaren ostean, esan du Ukraina gerran dagoela, eta ez dagoela «oroigarri hoberik egunero soldaduak eta herritar errugabeak hiltzen dituztela» gogoratzeko.
