Joan den ostiralean Espainiako Kongresuak Mariano Rajoy PPko presidentegaiari konfiantza ukatu eta gero, beste fase batean sartu dira gobernuburu bat aukeratzeko negoziazioak. Espainiako Kongresuko lehendakari Ana Pastorrek gaur jakinarazi dio Espainiako errege Felipe Borboikoari Rajoyk ez duela kongresuaren konfiantza eskuratu, eta hark elkarrizketarako deia egin die alderdi politikoei. Beste bilera sorta bat egin beharrean, negoziatzeko astia utzi die.
Hauteskundeak berriro egiteko atzerako kontua, ordea, hasia da ostiralaz geroztik. Rajoyri ezezkoa eman eta gero, PSOEk zer egingo duen da zalantza nagusia. Pedro Sanchez PSOEko idazkari nagusiak "trabatze politikoari denen artean irtenbide bat" ematera deitu ditu alderdiak, eta bilera sorta bat iragarri du indar politikoekin. EH Bildu, ordea, batzar horietatik kanpo utzi du.
Batzartu bai, baina horrek ez du esan nahi PSOEko hautagaia inbestidura saiora aurkeztuko denik: "PSOE ez da inbestidura batera aurkeztuko beharrezkoa den gehiengorik ez badu". Rajoyk ere alderdiekin hitz egiteko asmoa azaldu du.
