Jose Manuel de la Maza Espainiako fiskalburuak jakinarazi du fiskaltzak kereila bat aurkeztuko duela Kataluniako Generalitateko kideen kontra, eta beste bat parlamentuko mahaiko kideen kontra. Azaldu du gobernuaren kontrakoa Auzitegi Nagusian aurkeztuko duela, argudiatuta kargugabetu egin dituztela eta forudun izaera galdu dutela. Parlamentuko mahaiko kideen kontrakoa, berriz, Espainiak Epaitegi Gorenean aurkeztuko du, "gehienak" forudunak direla argudiatuta.
Bi erakunde horietako buruei matxinada, sedizioa eta diruaren erabilera okerra leporatu die, eta esan du deklaratzera deituko dituztela. Euren erabakiekin krisi instituzional bat eragin dutela esan du, "independentzia deklarazioarekin" burutu dutena. De la Mazak gaineratu du oraingoz kautela neurririk eskatuko ez badu ere deklaratzera joaten direnean egin dezakeela, "leporatzen zaienaren larritasuna aintzat hartuta".
