George Herbert Walker Bush AEBetako presidente ohia hil zen atzo, haren seme Geroge W. Bushek —bera ere AEBetako presidente izandakoa— jakinarazi duenez.
Bushek 40 urteko ibilbidea egin zuen AEBetako politikaren lehen lerroan. Kongresuko ordezkaria izan zen, NBEko enbaxadorea, CIAko zuzendaria, Ronald Reaganen agintean AEBetako presidenteordea —1981 eta 1989 bitartean—, eta, azkenik, AEBetako presidentea 1989 eta 1993 urteen artean.
Bere agintaldian, Gerra Hotzaren amaiera gidatu zuen, eta golkoko lehen gerran eta Panamako inbasioan parte hartu zuen. Nazioartean lortutako gerra garaipenek eta garaipen diplomatikoek, ordea, ez zioten kargua berritzeko balio izan, eta Bill Clintonek hartu zuen haren lekua.
Ibilbide politikoa hasi aurretik, 18 urte zituela, armadan izena eman zuen Bushek, eta hegazkin pilotu izan zen II. Mundu Gerran. Lurrera bota zuten gudan, baina itsaspeko batek erreskatatu zuen.
