Azken egunetan Nepalen izandako euriteek eta horien ondorioz gertatutako luiziek gutxienez 88 hildako eragin dituzte, eta desagertuta dauden pertsonak dozenaka dira. Horixe jakinarazi dute gaur Asiako herrialdeko agintariek.
Erreskate taldeek beste 11 gorpu berreskuratu dituzte gaur, eta horiei gehitu behar zaizkie, Barne Ministerioaren zenbaketaren arabera, asteartean erreskatatutako 14 gorpuak, eta asteazkeneko 63ak. Panchthar eskualde menditsuan topatu dituzte gorpu gehien: 27.
Gurutze Gorriko kideak gehien kaltetutako eremuetara joan dira, eta, iturri ofizialek esan dutenez, «ezinbesteko laguntza» ematen ari zaizkie euriteek eta luiziek kalte egin dieten milaka pertsonei. Eguraldi iragarpenaren arabera, ekaitz gogorrak espero dituzte datozen orduetan ere.
Euriteek kalte pertsonal eta material handiak eragiten dituzte urtero montzoien garaian (ekainetik irailera), bai Nepalen eta baita Asia hegoaldeko beste herrialde batzuetan ere. Adituek esan dute azkeneko denboraleak ezustean harrapatu dituela. Indiari ere kalte egin diote azken euriteek, eta 100 bat hildako eragin.
