Puigdemont kartzelara" eta "gelditu kolpistak" gisakoak edonon entzun zitezkeen atzo eguerdian Bartzelonako kaleetan. Izan ere, milaka lagun bildu zituen Societat Civil Catalanak antolatu eta eskuineko alderdi nahiz erakundeek babestutako manifestazioak. Nahikoa da! Berreskuratu zentzua! lelopean egin zuten independentziaren aurkako protesta.
Manifestazioa eguerdiko hamabietan zen abiatzekoa, Urquinaona plazatik. Baina ordua baino lehenago iristen hasiak ziren Espainiako hainbat herri eta hiritatik joandako autobusak —ehundik gora antolatzaileen arabera—. Tartean, alderdi politikoetako ordezkariak, besteak beste Madrilgo erkidegoko presidente Cristina Cifuentes eta Ciudadanoseko Albert Rivera.
Goizean goiz izan zen bestelako elkarretaratzerik; esaterako, 400 pertsona inguruk Guardia Zibilaren kuartelaren aurrean egin zutena.
Barcelona #8Oct
— Carlos Ariztegui (@ariztegui) 2017(e)ko urriak 8
Viva la Policia,
Viva La Guardia Civil,
Viva España,
Visca Catalunya @policia@guardiacivilpic.twitter.com/lAsFqqZm7M
Antolatzaileek eskatua zuten protesta baketsua izan zedila. Ordea, izan ziren liskarrak ere. TV3 kateko hainbat kazetarik salatu dute iraindu eta jo egin zituztela manifestazioaren berri ematen ari zirela.
Akusazioak eta oharrak
Protesta amaieran, Mario Vargas Llosa idazleak eta Josep Borrell ministro ohi sozialistak hartu zuten hitza. Batak zein besteak ohartarazi zioten Carles Puigdemont presidenteari "alferrik" ari dela "Espainia zatitzeko ahaleginetan". Literatura Nobel saridunak adierazi zuen nazionalismoak direla "pasiorik okerrenak" eta historian "heriotza gehien" eragin dutenak.
Societat Civil Catalanak leporatu zion Generalitateari independentistak ez diren katalanek "bizi duten bazterketa" bultzatzea. "Nazionalistak amildegiaren ertzeraino heldu dira, eta orain handik jaurti nahi dute herrialdea. Gaur, banatutako gizarte bat gara, eta, egoera okertzea nahi ez badugu, zubiak eraikitzen hasi behar dugu".
