Sri Lankako Armadako iturrien arabera, lurrikarak 10.000 hildako utzi zituen. Baina, tamilen menpeko lurraldean beste 2.000 pertsona inguru hil zirela esan zuen erresistentziak. Indonesian, bestalde, hildakoen kopurua 5.000 eta 10.000 artean egon daitekeela uste du Gobernuak. Indian, aldiz, 6.800 hildako utzi zituen itsasikarak. Gehienak Tamil Nadu eskualdean eta Andaman eta Nicobar uharteetan. Azken horietan 3.000 izan daitezke hildakoak, Polizia iturrien arabera. Asian ez ezik, Afrikan ere izan zuen eragina itsasikarak. Somalian, esaterako, ehunka arrantzale desagertu ziren olatu erraldoien azpian. Unicef Nazio Batuen Haurren Laguntzarako Funtsaren arabera, hildako eta desagertutakoen heren bat adingabeak dira eta hurrengo orduetan ugaritu egingo da hildakoen kopurua. «Arrantzale txiroak eta hondartzatik gertu bizi ziren herritarrak izan dira kaltetuenak», nabarmendu du erakundeak.
Milioika kaltetu
Itsasikarak etxerik gabe utzi zituen milioika pertsona eta ospitaleak suntsitu zituen. Milaka lagun desagertuta zeuden, oraindik, bart arratsean. Horien artean atzerritar asko. Era berean, ur zikinek eragiten dituzten gaixotasunak zabalduko diren beldur da Gurutze Gorria.
Herritarrak «beranduegi» ohartarazi zituztela onartu zuten atzo Indonesia eta Thailandiako agintariek. Baina ez zutela gerta zitekeenari buruzko aztarnarik nabarmendu zuten. Indiako Ozeanoan ez dago tsunami-ak aurreikusteko sistemarik. Sri Lankan eta Indonesian milioi bat lagun inguru geratu dira etxerik gabe, hurrenez hurren. Lehenengoan, bestalde, 400 preso inguruk egin zuten ihessegurtasun handiko kartzeletatik, nahasteaz baliatuz. Thailandiako Armadak, berriz, helikopteroak eta ontziak bidali zituen inguruko uharteetara zaurituen bila. Atzo goizaldean lurrikara txikiagoak izan ziren Andaman eta Nicobar uharteetan. Horietako batzuk 6.5 gradura iritsi ziren Richter eskalan. Hori dela-eta, Indiako agintariek kostaldetik urrun mantentzeko eskatu zieten herritarrei, lurrikarek olatu erraldoi gehiago eragin ditzaketelakoan.
«Orain arteko okerrena»
«Azken urteetako hondamendi naturalik handiena izan da asteburu honetakoa, herritar gehien bizi diren eskualdeak suntsituta geratu dira», esan zuen Jan Egeland Nazio Batuen Erakundeko larrialdietarako laguntzaren arduradunak. Chandrila Kumaratunga Sri Lankako presidentearen esanetan, berriz, «inoizko sarraskirik handiena» izan da hangoa.
Kaltetu eta hildakoen artean turista ugari zeuden, horietako askok euren maleta eta dokumentuak galdu zituzten. «Eraikin baten altuera zuten urezko hormak gure hotelaren gainera erori ziren», azaldu zuen turista batek. Olatu erraldoiek, etxeak ez ezik, trenbideak ere suntsitu zituzten Sri Lankan. Iturri ofizialen arabera, hilabeteak beharko dituzte trenbide sarea konpontzeko.
Indonesiako Aceh eskualdea itsasikara izan zen lekutik oso gertu dago. Hori zela-eta, itsasoko urek kostaldearen zati handi bat estali zuten. Banda Acehen, hiriburuan, soldaduek hondakin artetik gorpuak ateratzen jarraitzen zuten atzo arratsaldean. Uholdeen ondorioz, 3.000 pertsona hil eta beste 22.500 desagertu ziren eskualde horretan. «Heriotza itsasotik etorri da. 20 minutuan bi metroko altueraraino iritsi zen ura», esan zuen Satya Kumarik, Indian bizi den gizonezko batek. Bestalde, Indonesiako Gobernuak hiru eguneko dolualdia deitu zuen atzo.
«Denbora asko beharko dugu hildakoen gorpuak jasotzeko», nabarmendu zuen Thaksin Shinawatra Thailandiako lehen ministroak. Phuketen izan zen atzo lehen ministroa. Uharte hori izan zen kalte gehien jasan dituenetako bat. Urtero hiru milioi turista inguru joaten dira Phuketera oporrak igarotzera. Hango erietxeek hildakoen eta zauritutakoen izenen zerrendak kaleratu zituzten atzo. Horietako askoren ondoan zera zioen: «Herritartasuna ezezaguna».
-
