Jaled Meshal Hamaseko lider politikoak erbestetik gidatu du mugimendua azkeneko hamarkadetan. Gaur Egiptotik sartu da Gazara, eta estatuburu bati bezalako harrera egin diote. Ismail Haniya lehen ministroak egin dio harrera, beste hainbat goi kargurekin batera. Meshal hunkituta iritsi da: "Nire bizitzako egunik zoriontsuenetako bat da".
Hamasen sorreraren 25. urtemuga ospatzen ari dira egunotan Gazan, eta ospakizun ekitaldietan geratuko da. Al Fatah eta Hamasen arteko hartu-emanen estutzea gertatzen ari den unean iritsi da Meshalen bisita.
