Japonian konstituzioaren aurkakotzat jo dute sexua legez aldatzean antzutu beharra

Japoniako Auzitegi Gorenak atzo jakinarazi zuen konstituzioaren kontrakoa dela sexua legez aldatu nahi dutenak antzutzera behartzea. Hamabost epaileen erabakia aho batezkoa izan da; argudiatu dute arauak behartu egiten duela «erabaki gogor bat» hartzera, «edo operatu edo sexua aldatzeko erabakia bertan behera utzi».

2004an sartu zen indarrean legea, eta sexua legez aldatu nahi dutenei eskatzen diete, batetik, genero disforiaren diagnostiko bat aurkezteko —gutxienez bi medikuk egina—, eta, bestetik, bost baldintza betetzeko. Honako hauek dira: gutxienez 18 urte izatea; ezkonduta ez egotea; adingabeko haurrik ez izatea; «beste sexuaren antzeko organo genitalak» izatea; eta «ugalketa guruinik ez izatea» edo horiek «beren funtzioa galdua izatea».

Emakume transexual batek aurkeztu zuen salaketa, eta haren abokatuek argudiatu zuten azken bi baldintza horiek urratu egiten zutela, besteak beste, diskriminaziorik gabe bizitzeko beren bezeroak duen eskubide konstituzionala, eta, aldi berean, «transexualei kalte fisikoak» eragiten zizkiela.

Epaileek ideia horiei ere egin zieten erreferentzia erabakiaren berri ematean, esan baitzuten arauak mugatu egiten duela «pertsonek duten eskubidea beren borondatearen kontra gorputza inbadi ez diezaieten». 11.919 lagunek aldatu dute legez sexua Japonian, legea 2004an indarrean sartu zenetik iaz arte.

Gorenaren erabakiaren ondorioz, gobernuak eta parlamentuak legedia moldatu beharko dute azken baldintza horri dagokionez; epaileek, ordea, beste auzitegi batera bidali dute genitalei buruzko baldintza. Hori ikusirik, atzo salatzaileak komunikatu baten bitartez esan zuen prozesu judizialaren emaitza ez dela «espero bezalakoa» izan: «Oso etsita nago nire sexu aldaketa ez delako orain gauzatuko».

Human Rights Watch gobernuz kanpoko erakundeak bide beretik jo zuen. Pozik agertu zen lehen erabakiarekin, nahiz eta horretaz «berandu» ebatzi duten; eta, bigarrenari dagokionez, transexualen eskubideak babestu beharraz ohartarazi zuen.

Japonia kontserbadorea da arlo sozialeko aferei dagokienez. Hori bai, urteotako inkesta askoren arabera, handitzen ari da LGTBI kolektiboaren eskubideak jasotzen dituzten legeen aldeko jarrera. Halere, ez dute aurrerapauso askorik eman; horren adibide, Japonia da G7koen herrialde bakarra sexu berekoen ezkontza aitortzen ez duena.