Jean Claude Juncker Europako Batzordeko presidenteak iragarri du "lan bilera informal" batera deitu dituela Europako Batasuneko hainbat gobernuburu. Bileraren helburua "migrazio eta asilo auzia" aztertzea da, datorren astean Europako Kontseiluak egingo duen bileran irtenbideak bilatze aldera.
Junckerrek Twitter sare sozialean bidali duen txioan aipatu ditu Espainiako Gobernuko Presidentetzaren kontua, Frantziako presidente Emmanuel Macronena, Sebastian Kurz Austriako kantzilerrarena, Steffen Seibert Alemaniako gobernuko bozeramailearena, Alexis Tsipras Greziako lehen ministroarena, Giuseppe Conte Italiakoarena, Boyko Borissov Bulgariakoarena eta Joseph Muscat Maltakoarena.
I am convening an informal working meeting on migration and asylum issues in Brussels on Sunday, in order to work with a group of Heads of State or Government of Member States interested in finding European solutions ahead of the upcoming #EUCO. #MigrationEUpic.twitter.com/qXJaghR20v
— Jean-Claude Juncker (@JunckerEU) 20 de junio de 2018
Merkelek eta Macronek baieztatu dute Junckerrek iganderako deitu duen goi bileran izango direla. Hain justu, bezperan, Pedro Sanchez Espainiako presidentea hartuko du Frantziako gobernuburuak, errefuxiatuen auziari buruz hitz egiteko.
Aurretik, elkarrekin aztertu dute auzia Macronek eta Merkelek. Atzo egin zuten bileran adostu zuten errefuxiatuen krisiari elkarrekin erantzutea. Hiru ideia nabarmendu zituen Frantziako presidenteak: Europara doazen migranteen jatorrizko herrialdeekin eta bidean gurutzatzen dituzten herrialdeekin lankidetza areagotzea; Europako mugak "hobeto babestea", Frontex mugak babesteko agentzia "indartuz"; eta asilo eskariak arautzen dituen Dublingo Ituna berrikustea.
Merkelen eta Macronen bileraren egun berean filtratu zuten datorren asteko goi bilerako ondorioen zirriborroa. Testu horren arabera, Bruselak proposatuko du iheslarientzako zentroak sortzea EBren mugen atarian, gune horietan zehazteko migratzaileen estatusa.
