Emmanuel Macron PSko ministro ohi eta Martxan mugimenduko hautagaiak irabaziko ditu Frantziako presidentetzarako hauteskundeak, Ipsos Spra Steria etxeak eginiko inkesta baten arabera. Zabaldu duenez, bozak datorren igandean balira, Marine Le Pen Fronte Nazionaleko hautagaia izango litzateke garailea lehen itzulian, botoen %25 jasota. Macron litzateke bigarrena, %24 botorekin, eta Francois Fillon Errepublikanoen presidentegaiak botoen %18 eskuratuko lituzke.
Bigarren itzulian, ordea, Macronek alde nabarmenagoarekin irabaziko luke; %62 boto eskura litzake, eta Le Penek, berriz, %38. Ipsos Sopra Steriak azaldu du Benoit Hamon Alderdi Sozialistako hautagaia ez litzatekeela bigarren itzulira igaroko, eta hori baliatuko lukeela Macronek bozak irabazteko.
Apirilaren 23an izango da hauteskundeen lehen itzulia, eta maiatzaren 7an bigarrena. Bozetarako bidea, ordea, auzitegiak ari dira baldintzatzen; Parisko fiskaltzak Macron ikertuko du, ustezko faboritismoagatik, eta Fillon, berriz, inputatuta dago, diru publikoa modu bidegabean erabiltzea egotzita.
