Espainiako Kongresuaren ezetza "ez da prozesuaren amaiera". Kongresuko eztabaidan bozketa egin eta bost minutu eskasera, prentsaurrean agertu zen atzo Artur Mas Kataluniako Gobernuko presidentea, eta esan zuen "aukera bat galdu" zela bozketan: "Luzatutako esku bat ez dute hartu. Hala ere, gure eskuak luzatuta jarraitzen du".
Masen ustez "borondate politikoa" falta izan zen: "Beldur diote Kataluniako herriak botoa emateari". Nabarmendu zuenez, "ez dute lege proposamen bat tramitatzen ere utzi. Ez dute baietz esan nahi izan".
Nolanahi ere, ohartarazi zuen lanean jarraituko dutela Kataluniako erakundeek, "galdeketa egite aldera marko legalak eraikitzeko".
