Markak hausteko urtea izango da 2023a, klima larrialdiari dagokionez. Ekainetik urrira, hilez hil gainditu da hil bakoitzeko batez besteko tenperaturarik beroena. Gainera, uztaila izan da inoizko hilabeterik beroena. Azaroak beste errekor bat utzi du, Europako Batasuneko Copernicus behategiaren datuen arabera. Lehen aldiz gainditu da, egun batez, bi graduko tenperatura igoera industria aurreko aroarekin (1850-1900) alderatuta.
Azaroaren 17an, 2,07 gradu beroagoa izan zen batez besteko tenperatura. Eta larunbatean, berriz, 2,06 beroagoa. Geroztik, jaisten hasi da termometroa, iturri beraren arabera, eta bi graduko langaren azpitik jarri da harrezkero.
Copernicusek X sare sozialean eman du gaur horren berri.
🌡️ ERA5 data from @CopernicusECMWF indicates that 17 November was the first day that the global temperature exceeded 2°C above pre-industrial levels, reaching 2.07°C above the 1850-1900 average and the provisional ERA5 value for 18 November is 2.06°C. pic.twitter.com/lLGwlCsZtP
— Copernicus ECMWF (@CopernicusECMWF) November 20, 2023
Parisko Hitzarmena, urrun
Bestalde, Nazio Batuen Erakundearen (NBE) Ingurumenerako Programak gaur aurkeztu du 2023ko isurketen arrakalari buruzko txostena, eta horretan atera duen ondorio nagusia da munduak oraindik asko falta duela berotzea gehienez 1,5 gradukoa izan dadin. Gehienez bi gradukoa izatea ere oso zaila da, txostenaren arabera. Orain arteko politikei eutsiz gero, mende amaieran 2,9 gradu beroagoa izango da munduko batez besteko tenperatura. 2021etik 2022ra %1,2 handitu ziren berotegi gasen isurketak, eta 57,4 gigatona baliokide isuri ziren. Herrialdeek hartutako konpromisoak betez gero, 2,5 gradura mugatuko litzateke munduaren berotzea, eta, zero isurketako promesak beteko balira, 2050erako bi gradura mugatuko litzateke gehienezko berotze hori.
