Etenik gabe Gaza bonbardatzen ari da oraindik ere Israelgo Armada. Abisua atzo eman zuen Benjamin Netanyahu Israelgo jarduneko lehen ministroak: «Gure asmoa da erasoen intentsitatea eta kantitatea handitzea». Esan eta egin. Bart gauean beste zazpi lagun hil dira bonbardaketen ondorioz, eta dagoeneko 53 dira astelehenetik Tel Avivek hildakoak, Gazako Osasun Ministerioaren arabera; tartean, 13 ume. Zaurituak 320 dira gutxienez, ministerioaren arabera. Nazioarteko Zigor Auzitegiko fiskalburu Fatou Bensoudak gaitzetsi egin ditu bonbardaketak, eta ohartarazi «gerra krimentzat» jo litekeela Gazaren aurkako erasoaldia.
Armadak esan duenez, Hamas erakunde islamistari «2014tik emandako kolperik handiena» da, Gazan «helburu garrantzitsuak» suntsitu dituztelako eta Hamasen «inteligentziako pertsona gakoak» hil dituztelako.
Hamasek suziriekin erantzun du berriz. Gauean haietako 110 jaurti ditu Gazatik Tel Avivera, eta guztira sei dira haiek hildakoak; azkena soldadu bat izan da, suziri batek haren ibilgailua jo eta zaurien ondorioz hil dena. Israelgo Armadak jakinarazi duenez, goizeko hirurak aldera hasi dira lehen suziriak atzematen, eta hiritarrak babeslekuetara eraman behar izan dituzte. Hamasek salatu duenez, ezinbesteak erantzun behar izan du, Israel etengabe zibilen aurkako suziriak botatzen ari delako.
WATCH as the Iron Dome Aerial Defense System intercepts rockets over southern Israel: pic.twitter.com/xUz3bMuTzz
— Israel Defense Forces (@IDF) May 12, 2021
Erasoak gogortzeko Netanyahuren mehatxuari ere erantzun dio Hamasek. Ismail Haniya buruzagiak adierazi du bere erakundea «prest» dagoela erasoen gorakadarako: «Israelek egoera gogortu nahi badu, horretarako prest gaude, eta gelditu nahi badu ere prest gaude». Halaber, Israelgo eta lurralde okupatuetako palestinarren protestak goratu ditu. «Guztiok batera mugitzen ari gara, modu koherentean, okupazioari aurre egiteko», nabarmendu du.
Ekinaldiari eusteko asmoa berretsi du Jihad Islamikoaren adarreko Al-Quds brigadak ere, ohar batean. "Ez dugu atzera egingo gure erresistentzian, horren ordaina edozein dela ere", adierazi du. Tel Avivera eta hiri horren ingurura 100 suziri baino gehiago jaurti dituela ere jakinarazi du.
Israelgo Armadak zehaztu duenez, besteak beste, Hassan Kaogi Hamasen segurtasun militarreko saileko burua jo dute suziriekin, baita kontraespioitzako saileko burua ere, Wail Issa. Ez hori bakarrik: Gazako hainbat komisaria ere suntsitu dituzte, tartean, Hamasen Polizia egoitza nagusia. Baina, horiez gain, etxebizitzak ere suntsitu dituzte bonbardaketek. Bart, hamahiru solairuko dorre bat bota zuen Israelek, eta gaur ere sare sozialetan zabaldutako irudietan ikus daitezke bonbak etxeetara erortzen. Osasun Ministerioak zabaldutako datuen arabera, Gazako biktimen %43 haurrak eta emakumeak dira. Gau osoan erori dira bonbak Hamasen kontrolpeko eskualdean, eta, egunak argituta ere, gerra hegazkinek lanean jarraitu dute.
30 second of terror.
— Maha Hussaini (@MahaGaza) May 12, 2021
Gaza this morning.#GazaUnderAttack
pic.twitter.com/OS6bGOs88W
This happened in front of my house #GazaUnderAttackpic.twitter.com/BsUgoq0Yrx
— Farah Baker (@Farah_Gazan) May 12, 2021
Gazan ez ezik, Zisjordania okupatuan ere esku hartu dute Israelgo militarrek. Tubas herrian, 16 urteko Rashid Abu Arreh hil dute tiroz, beste palestinar bat atxilotzeko asmoz egindako operazio batean. Polizia operazioaren aurka protestan ari zen 26 urteko Hussein al-Titi ere tiroz hil dute. Atxilotuak ere ugari izan dira azken orduetan. Israelgo Poliziak zabaldutako datuen arabera 270 pertsona atxilotu dituzte, «istiluetan eta protestetan» parte hartzea egotzita.
Bitartekaritzek, porrot
Hortaz gain, Israelek ezezkoa eman dio NBE Nazio Batuen Erakundeak eta bitartekari lanak egiten ari den Egiptok proposatutako su-etenari. Tentsioa baretzeko nazioartearen eskaria erregu hutsa da. Egiptok bitartekari lana egiteko saiakera egin du azken egunotan, baina Sameh Xoukry Atzerri ministroak aitortu zuen Israelengandik ez zutela jaso horretarako «beharrezko erantzunik». «Azken egunetan, Egipto Israelengana eta egoerarekin kezkatuta dauden beste zenbait herrialderengana hurbildu da, eta esfortzuak biderkatzeko eskatu die, Jerusalemgo egoera gehiago larriagotu ez dadin», azaldu zuen. Ez zuen zehaztu zein diren Egiptorekin batera diplomazia lanetan ibili diren beste herrialdeak.
NBEk ere ziurtatu zuen tentsioa deseskalatzeko saiakerak egiten ari dela. Bi aldeei zuzendu zitzaien Antonio Guterres idazkari nagusia, eta eskatu zien «berehala» eteteko erasoak. Israel eta haren aliatu AEBak haren parte izanik, gatazkan esku hartzeko gaitasun handia du NBEk, baina herenegun izandako Segurtasun Kontseiluak agerian utzi zuen AEBek zer botere duten nazioarteko organismoan, herrialde horrek oztopatu egin baitzuen Jerusalemen hasitako indarkeria olatua gaitzesteko adierazpen bateratu bat publiko egitea, inplizituki Israeli erasoak eteteko eskaria egitea esan nahiko bailuke adierazpen hori onartzeak.
Gaitzespena atzo egin zuen NBEren Giza Eskubideen Kontseiluak, egunotako gatazkaren iturburura jo zuen eta Israel ere erantzule egin: «Israelek gehiegizko indarra erabili du manifestari palestinarren aurka, zeinak duela zenbait astetatik protestan ari diren okupatutako Jerusalem ekialdeko auzo batean hainbat familia etxegabetu nahi dituztelako».
Gaur iluntzean dira biltzekoak PAN Palestinako Aginte Nazionala eta PAE Palestina Askatzeko Erakundea. Zisjordanian egingo dute bilera, Ramallah hirian. Egunotan adierazpen ofizialik egin ez badute ere, PAEko iturriak kritiko agertu dira nazioarteko komunitatearekin, eta salatu haien adierazpenak ez direla izan «behar adina gogorrak».
Bien bitartean, Israelgo Defentsa ministro Benny Gantzek aurreratu du ez dituztela bonbardaketak etengo: «Gazan etxe orratzak erortzen ari dira, enpresak suntsitzen, tunelak ezabatzen, eta buruzagi militarrak hiltzen. Bonbardatzen jarraituko dugu, eta ondoren isiltasuna helduko da epe luzerako».
