Pakistanen hamabortz paramilitar hil dituzte talibanek, Afganistango mugan

Pakistango ipar-mendebaldean hamabortz paramilitar hil dituztela esan dute talibanek. Duela astebete bahitu zituzten Ipar Waziristango kontrol postu batean, Afganistango mugatik hurbil. Hil dituztela frogatzeko bideo bat erakutsiko dutela erran dute. Afganistaneko mugan eskualde federalak daude, eremu tribalak deritzotenak. Pakistango Estatuko indarrez gain, talde propioak dituzte, talibanen presentzia handia baita eremu horietan. Berriki argitaratu da talibanek Pakistango indarrei ez erasotzeko erabakia hartu zutela, ahalegin guztia mugaren bertze aldeko AEBetako tropen aurka bideratzeko. Iragan hilaren 31n, baina, Pakistango armadak hamabi taliban hil zituen Khyber barrutian. Azken hilketekin eraso hura mendekatu nahi izan dutela erran du Ehsanullah Ehsan talibanen bozeramaileak.