Carles Puigdemont Kataluniako presidente eta Junts per Catalunyako hautagaiarekin batera, ekitaldian parte hartu dute Bruselan babes hartuta dauden Kataluniako Gobernuko kontseilariek eta Belgikara bidaiatu duten hainbat hautagaik.
Puigdemontek abenduaren 21ean botoa ematera deitu ditu herritarrak, Kataluniaren "historiako hauteskunderik garrantzitsuenak" direla iritzita. "Gure historia ez dute beste batzuek idatzi behar", adierazi du. Puigdemonten arabera, hurrengo hauteskundeek argituko dute herritarrek 155. artikuluaren ezarpena onartzen duten ala ez. Espainiako Gobernuak artikulu hori "zilegitasunik gabe eta legez kanpo" aplikatu duela salatu du.
Junts per Catalunyak osatu duen zerrenda —PDECat alderdiko kideez gain, Jordi Sanchez ANCko presidente ohia eta beste hainbat indepedente ere hartzen dituena— alderdi interesetatik harago doala azpimarratu du Puigdemontek. "Kataluniaren militanteak izan behar dugu. Kontua ez da alderdien artekoa, kontua Kataluniari buruzkoa da". Haren esanetan, Junts per Catalunyaren zerrenda da independentisten arteko zerrenda bateratu baten antz handiena duena.
Bestalde, hauteskundeen emaitza onartuko al duten argitzeko galdegin die Puigdemontek Espainiako Gobernuari eta Europako Batasunari.
Puigdemont txalo artean eta "presidente" oihuekin hartu dute ekitaldian.
Entrada de @KRLS al primer acte de @JuntsXCat a Oostkamp, a Bèlgica pic.twitter.com/Uqq1yg7hZP
— CatInfo Política (@Cati_Politica) 25 de noviembre de 2017
