Europako hauteskundeak. Kanpaina
«Gazte errebeldeen ahotsa» izan nahi du EH Bilduk; «sistema pitzatzeko tresna»
«Gazte errebeldeen» ahotsa. Egungo sistema «pitzatu» eta Europa «oinarrietatik» aldatu nahi dutenen «tresna». Hori da Europako Parlamenturako hauteskundeei begira EH Bilduk Euskal Herriko gazteei proposatzen diena. EHU Euskal Herriko Unibertsitateko Donostiako campusean eginiko ekitaldi batean, Ikoitz Arrese eta Aitziber Salazar koalizioko kideek hilaren 25eko hauteskundeetan botoa ematera «animatu» dituzte gazteak. Aitortu dute EH Bildukoek ere «urrun» ikusten dituztela Europako instituzioak, baina azpimarratu dute beharrezkotzat jotzen dutela botoa ematea, Europaren «egungo eredua» eta «sistema» bera «pitzatzen» hasteko aukera ere badelako instituzio horietan parte hartzea. Koalizioko gazteekin eta ekitaldira bildu direnekin izan da Josu Juaristi Herriek Erabaki plataformako zerrendaburua.
Euskaraz eta gaztelaniaz irakurritako testu baten bidez, Arresek eta Salazarrek adierazi dute Europa «gaixo» dagoela eta azpimarratu dute horren «sintoma eta ondorio» direla, besteak beste, «langabezia, prekarietatea, homofobia eta arrazakeria». «Sendabidea», haatik, gazteen esku ere badagoela gogoratu dute. Koalizioko kideen arabera, «errepresioaren aurka borrokatzeko tokia» da Europa, eta horretan aritzeko «tresna» EH Bildu. Horrekin batera, uste dute Europa «behetik gora» eraiki behar dela eta gazteak politiken «oinarrian» jarri behar direla.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.