Mintzaidetza aurkeztu du Euskal Iheslari Politikoen Kolektiboak

Haiekin mintzatzeko eskatu diete Frantziari eta Espainiari, funtsezkoa delako iheslarien ekarpena gatazkaren konponbide politikoanLarunbatean haien bide orria ezagutzera emanen dute, Elkartasun Hatsa ekitaldian

Euskal Iheslari Politikoen Kolektiboko kideak, atzo, Baionan egindako agerraldian. Larunbatean Miarritzen eginen den ekitaldira joateko deia egin diote euskal gizarteari. NICOLAS MOLLO.
Aitor Renteria.
Baiona
2013ko ekainaren 13a
00:00
Entzun
Urrats historikotzat jo du Euskal Iheslari Politikoen Kolektiboak haren ibilbidean lehen aldiz mintzaidetza izendatu izana. Hogeita hamar iheslari inguruk hartu zuten parte atzo Baionan egindako agerraldian. Mundu zabalean, kontinente ezberdinetan dauden iheslariek osatzen dute solaskidetza, hainbat belaunalditako kide direlarik haren barnean. Ordezkaritza aurkezteaz gain, heldu den larunbatean Miarritzeko Irati gelan eginen den Elkartasun Hatsari sostengua adieraztea zen atzoko ekitaldiaren helburua. «Han presente egongo garela berresten dugu, eta gure ekarpena eramango dugula hara», erran zuen Kizkitza Gil de San Vicentek aurkezpenean.

Iheslarien mintzaidetza eta ekarpena gogoeta luze eta sakon baten emaitza izan direla nabarmendu zuten. Errepresioaren ondorioz, iheslarien kolektiboa mundu zabalean dago barreiaturik. Iheslari anitz nortasun agiririk gabe daude, eta bertze batzuk deportaturik urrutiko herrialdeetan. Bi estatuek ez dute gogoeta hori erraztu, eta traba ugari ukan dituzte eztabaida egiteko. Hala ere, «egoera politiko berrian kokatu ondotik, prozesu demokratiko bati ekarpena egiteko» urratsa egitea lortu du kolektiboak. Hori lortu ahal izateko berregituraketa prozesu bat burutu behar izan dutela jakinarazi zuten. Gogoeta horren emaitza plazaratzea deliberatu du kolektiboak.

Ildo nagusia

«Iheslariekin mintzatu behar da, hori da gure lerro buru nagusia, korapilo politikoaren parte izanik, korapilo hori askatzeko manerarik zuzenena baita». Espainiari eta Frantziari adierazi diete Euskal Herriak eta preseski iheslariek pairatzen duten arazo politikoa osorik konpontzeko iheslariak kontuan hartu behar direla. Gogoeta horren ildotik izendatu dute mintzaidetza, konponbide osoari buruz mintzatu ahal izateko estatuen ordezkariekin.

Era berean, dei egin diete euskal eragile sozial, sindikal eta herritarrei, baita alderdi politikoei ere, iheslariekin hitz egiteko gomita eginez.

Herria Dugu Arnas izena eman zioten iheslariek burutu duten gogoeta prozesuari. Horren haritik, maiatzaren bukaeran, urteetan euskal iheslari politikoei babesa eman dieten herritar taldeak Elkartasun Hatsa izeneko ekitaldia prestatu zuten, ekainaren 15erako, Miarritzeko Irati aretoan. Ekitaldi horretan euskal iheslari politikoak «kopuru handian» presente egonen direla berretsi zuten Gil de San Vicentek eta Jon Irazolak. Talde horri eskerrak eman zizkioten, aretoa iheslariei eskaini eta haien ahotsa entzutea posible egiteagatik. «Deialdia jaso dugu, eta baietz erantzuten diegu, ekitaldi horretan konponbiderako gure proposamena mahai gainean jarriko dugula adieraziz».

Euskal Herrian ireki den aro politiko berriak aukeraz beteriko garaia sortu duela azpimarratu zuten. Horren aitzinean, garai berrira egokituz, «gure konpromisoa eta ilusioa erantsi nahi diogu», erran zuten. Iheslari politikoen egoera bera da arazo eta konponbiderako traba. Ehunka dira mundu zabalean barreiaturik dauden iheslariak. 80ko hamarkadan, Frantziak 60 iheslari inguru deportatu zituen Afrika eta Ameriketako herrialdeetara, Espainiak horrela eskatuta. Gogoeta egin ahal izateko, iheslari guztiengana heldu behar izan dira, baita bertze herrialde batzuetan agiririk gabe bizi direnengana ere.

Egoerak zaildu egin du iheslarien arteko komunikazioa eta trabak gainditzea denbora eskatu du. Gainera, estatuek konponbideari ezarri dioten «blokeoa» ez da lagungarri izan horretan.

Atzoko agerraldian talde plurala osatu zuten iheslariek, baina antzeko kopuruan ziren kazetariak, gehienak Espainiakoak. Galderak egiten saiatu ziren, hala nola noiz itzuliko diren iheslariak etxera, nola edota hainbat komunikabidetan agertu izan diren berriak egia diren edo ez. Zorrotz erantzun zieten galderei, behin eta berriz. Atzoko agerraldiaren funtzioa mintzaidetza aurkeztea zen. Herriari egindako zina gogoratu zuten. Larunbateko ekitaldian izanen direla eta bertan jakinaraziko dutela haien bide orria. Espainiako komunikabideei ere hara joateko gomita egin zieten.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.