«Absoluzio epai hau Euskal Herrian irabazi dugu»

Lasaitasun eta poz aurpegiak zituztela agertu ziren atzo, jendaurrean, D3M eta Askatasuna auziko auzipetuak. Hiru urte eta erdi iraun duen haien aurkako auzi eta jazarpenak amaiera izan zuen eguna zen atzokoa. Absoluzio epaia jaso zuten, iragan maiatzean Espainiako Auzitegi Nazionalean epaitu ostetik itxaroten zuten epai bakarra, atzo adierazi zutenez Euskal Herrian epaiketa horren aurka eta eskubide zibil eta politikoen alde herritarrek eta eragileek egindako lan eta emandako babesari esker.

D3M eta Askatasuna auziko 11 auzipetu agertu ziren Donostian egindako prentsaurrekoan. Haiekin batera, ezker abertzaleko bozeramaile Maribi Ugarteburu. Eta mahaiaren gainean, panpina errusiar bat, iragan maiatzaren 5ean, epaiketa hasi eta bi egunera, auzia salatzeko Bilbon egin zen manifestazioan auzipetuei oparitu zien panpina bera, azkenaldian eskubide zibil eta politikoen aldeko sinbolo bilakatu dena.

«Epaiketan esan genuena errepikatu nahi dugu. Behin eta berriro azpimarratu genuen lan politikoa egitea eta eskubide zibil eta politikoak defendatzea, kasu honetan hauteskundeetako parte hartzea defenditzea, izan zela gure asmoa», adierazi zuen Arantza Urkaregik, auzipetuen izenean hitza hartuta.

Absoluzioa «berri pozgarria» dela azaldu zuen Urkaregik, baina auzipetuek argi daukate epai hori ez dutela Auzitegi Nazionalean irabazi: «Absoluzio epai hau Euskal Herrian irabazi dugu», esan zuen, «eskubide zibil eta politikoen alde egindako lanari eta emandako babesari esker».

D3M eta Askatasuneko auzipetuek eskerrak eman zizkieten herritarrei eta eragileei, eta bereziki Eleak mugimenduari, eskubide zibil eta politikoen alde —eta,bide batez, auzi horretako auzipetuen alde— egindako lanarengatik. «Argi dugu herritarren eta elkarteen mugimendurik gabe epaia bestelakoa ere izan zitekeela», azpimarratu zuen Urkaregik.

Hiru urte eta erdian pasatu izan dutena esaldi bakar batean laburbildu zuten: «Gure ideologia eta lan politikoarengatik atxilotu, espetxeratu eta epaitu gintuzten». Eta ideia bat nabarmendu nahi izan zuten: «Espero dugu gure kontrakoa izan dadila euskaldunen aurkako azken epaiketa politikoa».

Adierazi zuten aurrerantzean ere lan politikoa eginez jarraituko dutela, «Euskal Herri aske eta justua» lortzeko. «Pertsona guztien eskubideak eta Euskal Herriaren eskubideak» defendituko dituzte, Urkaregiren esanetan.

Sortu, Konstituzionalean

Aurreko bi lan saioetan bezala, Espainiako Auzitegi Konstituzionalak aste honetako agendan edukiko du Sortu alderdiak aurkeztutako babes helegitea. Gaurtik osteguna bitartean du lan saioa Konstituzionalak, baina gaia agendan edukitzeak ez du esan nahi epaia emango dutela, ezta aztertzen hasiko direla ere.

Sortu, dena den, ez da ezker abertzalearekin lotuta Auzitegi Konstituzionalean aste honetan izango den berri bakarra. Izan ere, ostiralean amaituko da Bateragune auziaren epaiarengatik babes helegitea Konstituzionalean aurkezteko epea, eta defentsek iragarri zuten babes helegitea aurkeztuko zutela.

D3M eta Askatasuneko auzipetuek atzo egindako agerraldia.

www.berria.info