Albistea entzun

«Iraultza demokratikoan» sakontzeko, indar metaketa lehenetsiko du Sortuk

Alderdiaren oinarri ideologikoei eta antolakuntzari buruzko txostena aurkeztu dute
Talde sustatzaileko kideak, alderdia erregistratu zuten egunean.
Talde sustatzaileko kideak, alderdia erregistratu zuten egunean. A. C. / ARP

Jokin Sagarzazu -

2012ko azaroak 8 - Donostia

Ezker abertzalearen Zutik Euskal Herria ebazpenaren adierazpen politikoa da Sortu. Hala dio alderdiaren eratze prozesuan aritu den lantaldeak eztabaidarako aurkeztu duen txostenean. Azken hilabeteotan herri eta auzoetan abian jarritako lantaldeetan jasotako ekarpenen emaitza da txostena. Atzo aurkeztu zuten ezker abertzaleko Joseba Alvarezek, Pernando Barrenak eta Maribi Ugarteburuk. Alderdiaren oinarri ideologikoak eta antolakuntza eredua biltzen dira txosten horretan; aurki, beste bat aurkeztuko dute alderdiaren ildo politikoarekin.

Azaroaren 17an eta 24an egingo dituzte lehen herri eta auzo bilerak, txostenean jasotako oinarri ideologikoei buruz eztabaidatzeko. Hurrengoa, abenduan egingo dute, ildo politikoan sakontzeko. Urtarrilean izango da antolaketari buruzkoa, eta otsailaren 23an egingo dute alderdiaren lehenengo Batzar Nazionala.

Praktika politikoa«Elkarlana, estrategia osoaren arrakastaren giltza»

Txostenean jasotzen denez, abian den «prozesu demokratikoan» sakontzea izango da Sorturen xedea, «egoera demokratikoa» lortzeko, Euskal Herriaren nazio izaera eta erabakitzeko eskubidea onartuko duen esparru politikoa adosteko eta alderdiaren helburuak —independentzia eta sozialismoa— gauzatzeko.

Helburu horietara iristeko bitartekoak izango dira Zutik Euskal Herria ebazpenean finkatutakoak. «Soilik bitarteko politikoak erabiltzeko erabakia eta aldebakartasuna». Bi lan tresna horiekin batera, indar metaketaren bidean sakondu nahi du Sortuk. «Elkarlanak lehentasun osoa du, estrategia osoaren arrakastarako gakoa baita». Luzera begira, testuak dio elkarlan eremua zabaldu behar dela. Edonola ere, beste erakundeekiko eta eragileekiko errespetu osoa gordeko duela dio, «norberaren autonomia eta erabakitzeko gaitasuna errespetatuta». Elkarlan hori akordio estrategiko zein aliantza taktikoen bidez gauzatu nahi du. Sorturen talde eragilearen arabera, erabakitzeko eskubidea izango da prozesu demokratikoaren «muina», baina eskubide hori egunez egun egin behar den prozesu gisa ulertu behar dela dio, nazio eraikuntzaren eta eraldaketa sozialaren mesedean.

Hori hala, «Iraultza Demokratiko Nazionalerako fasean» sakondu behar dela dio txostenak, eta erabakitzeko eskubideak fase horren «oinarri demokratikoa» izan behar duela. Erabakitzeko eskubidea aitortu eta hori lortu bitarterako, baina, «fase ezberdinak eta tarteko helmugak» bereizten ditu, besteak beste, oraindik subjektu politikoa osatu behar delako. Hala, prozesu horretan ere «erdibideko helmugak» zehazten ditu Sortuk. «Esate baterako, lau herrialdeko Autonomi Estatutu bat Hego Euskal Herrian —Nafarroako berezitasuna aitortu beharko duen eta lurraldeen arteko harremana zehaztuko duen barne araudia ere jaso beharko du— eta Ipar Euskal Herriaren instituzionalizazioa».

Gatazkaren ondorioen konponbideari begira ere, akordioak sustatzeari emango dio lehentasuna Sortuk, «orain arte etsai edo arerio» izan direnekin ere elkarlanerako eremuak zabalduta. Txostenean nabarmentzen denez, ETAk bere jardun armatua behin betiko amaitutzat jo badu ere, Espainiak eta Frantziak bere horretan eusten diote «errepresio makineriari». Sortuk horri aurre egiteko ardura bere gain hartu nahi du, «eta baita gaur egun muturreko egoera pairatzen duten euskal preso politikoen eta euskal iheslarien eskubideen aldekoa ere».

Aldi berean, Sortuk borondatea agertu du gatazkak eragindako biktima guztiak aitortzeko, egia osoa ezagutarazteko eta, etorkizunean bizikidetza egokia lortzearren, zauriak ixteko dinamiketan konpromisoa hartzeko.

Oinarri ideologikoak«Ezker abertzale osoaren erreferente politikoa»

Oinarri ideologikoei dagokienez, Sortuk bere egin ditu ezker abertzalearen «helburu estrategiko historikoak»: «Euskal Herri independente, sozialista, feminista eta euskalduna lortzea, internazionalismoaren, ekologismoaren eta aniztasunaren balioetan ere oinarritua». Ezaugarri horiei buruzko azalpenak jasotzen dira txostenean. Besteak beste, Sorturen xedeak abertzale eta ezkertiar guztiak biltzea izan behar duela dio, eta, beraz, ezkerra eta sozialismoa ulertzeko «modu guztiek» izan behar dutela lekua bertan. «Proiektu politiko malgua izan behar da gurea, biltzeko joera izango duena, ez jendea alboratzekoa».

Talde eragileko kideek azaldu dutenez, Sortu ez da ezker abertzalearen birfundazio bat. «Espazio historiko» hori berrantolatzea izango da alderdiaren xedea, «eta ezker abertzale osoaren erreferente politiko bilakatzea».

Euskal Herri osoko eta osorako antolakundea izan nahi du, beraz, eta, horretarako, Ipar zein Hego Euskal Herrian antolatuko du bere burua. Iparraldearen inguruan, baina, «bere bidea» egin behar duela dio. Hegoaldean bezala, «Zutik Euskal Herria-ra bidea egin duten lagunentzat» izango da Sortu.

Jardun eremuei dagokienez, hiru izango dira: masa borroka, konfrontazio ideologikoa eta lan instituzionala. Hiru eremu horiek beren isla izango dute alderdiaren erabakiguneetan. Horretan, halaber, leku garrantzitsua izango du desobedientzia zibilak, «demokrazian sakontzeko bide gisa» ulertuta.

Antolakuntza eredua«Barne demokrazia, euskara eta parekidetasuna»

Antolakuntzaren arloan, berriz, barne demokrazia, euskara eta parekidetasuna izango dira alderdiaren ezaugarriak. Barrura begira, bere egitura eta atal nagusi guztiek euskara hutsez funtzionatuko dute, eta partaide guztiak euskaldunak izango dira.

Hiru erabaki gune izango ditu alderdiak: herri edo hiri mailako antolakundea, herrialde mailakoa eta nazio mailakoa. «Behetik gora» aukeratuko dira Sorturen arduradunak, baita hauteskundeetarako hautagaiak ere—Sortuk, halere, ez du bere izenean ordezkaritza instituzionalik izango, indar metaketaren araberako koalizioaren parte izango baita—.

Herri batzarretan parte hartzen ari diren herritarrek proposatu ahal izango dituzte eurek nahi dituzten izenak, eta boto gehien jasotzen duten pertsonek beteko dituzte kargu horiek —alderdiaren kargu guztien %80—. Gainontzekoak, herri, herrialde eta nazio mailako taldeetan proposatutako zerrendetatik berretsi beharko dira. Izenak proposatu eta horiek kontrastatu ostean, batzarretako kideek berretsi beharko dituzte hautagaitza horiek.

Sortun hiru kide mota egongo dira: oinarri sozialeko kidea, Sortukidea edo afiliatua eta militantea —militantea da Sortuko egituran zein herri erakundeetan iraunkorki lanean diharduena eta antolakuntzaren barne bizimoduan parte hartze aktiboa duena—. Hirurek dute herri eta auzo batzarretan parte hartzeko eta erabakitzeko eskubidea.

Abenduan bukatuko da hautagaiak proposatzeko epea, eta hortik aurrera hautagaitzak berresteko epea hasiko da; otsailaren 9an bozkatuko dira.

Txostena osorik irakurri nahi izanez gero: www.sortu.net

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Llotja de Marreko alderdien ordezkariak, iaz, Espainiako Kongresuan. ©Javier Lizón / EFE

Alderdi subiranistek Espainiako Konstituzioa «agortuta» dagoela aldarrikatu dute

Paulo Ostolaza

Konstituzioaren Egunaren bezperan, ohar bateratu bat plazaratu dute Llotja de Marreko akordioaren sinatzaileek. «Herrien autodeterminazio eskubidean oinarritutako eredu bat» eskatu dute.

 ©GORKA RUBIO / FOKU

«Gure ustez, beharrezkoa da EAJ gobernutik kanporatzea»

Gotzon Hermosilla

Ezker Anitza-IUk X. Batzarra egin du, eta EAEn «ezkerreko alternatiba sendo bat» osatu behar dela nabarmendu dute berriro, «Nafarroan egin denaren antzera».
 ©CHEMA MOYA / EFE

«Kontuen emaitzak ikusita, esango nuke badugula zer esana»

Iosu Alberdi

Kongresuan kontuen inguruko lehen akordio bat lortu arren, Esteban ez da negoziazio mahaitik altxatu. Aurrekontuen ingurukoak izan ditu hizpide; baita datozen hilabeteetan irits daitezkeen lege erreformak ere.
Bakegileen agerraldi jendetsua, gaur, Hiriburun ©Guillaume Fauveau

Bakegileek mobilizazio fase berria abiatuko dute

Ekhi Erremundegi Beloki

Gatazkaren konponbidean aitzina egiten Frantziako Gobernuaren «borondatea falta» dela eta, desobedientzia zibilari ekingo diote. Urtarrilaren 8an Baionan eginen duten manifestazioa izanen da fase berriaren hasiera.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.