Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Capdeviellek eta Seaskak lege egokitzapena aztertu dute

Maitiak lege koadroa aldatzea hobetsi du, kolektibitateei aukera emanez ikastolen egoitzak diruztatzeko
Joan den larunbatean Baionan milaka herritar bildu ziren, ikastolei sostengua adierazteko.
Joan den larunbatean Baionan milaka herritar bildu ziren, ikastolei sostengua adierazteko. BOB EDME

Aitor Renteria -

2013ko otsailak 6 - Baiona

Paxkal Indo Seaskako lehendakaria eta Colette Capdevielle diputatu sozialista atzo arratsaldean bildu ziren, elkarrekin aztertzeko nola osa daitekeen lege bat, ikastolen diruztatze publikoa ahalbidetuko duena. Baionako suprefetak Hendaiako ikastolari egindako mehatxuaren ondoren, Falloux legea-ren traba saihestea, eta ikastolen ereduarentzat egokia den lege koadroa asmatzea zen bilkuraren xedea. Bertzalde, Seaskak bere hartan eusten dio du gaurko deitua zuen elkarretaratzeari, Baionako Euskaldunen plazan, arratsaldeko hiruretan.

Capdeviellek ere bilkura baikorra izan dela nabarmendu du Indok. «Diputatuak landua zuen txostena, eta gure proposamenak ere aztertu ditu, ikastolentzako egokia izan daitekeen legea osatu ahal izateko, hizkuntza gutxituekiko abegia duten diputatu taldearekin batera», erran du Indok.

Ikastolen egoera arautu behar dela nabarmendu du. Ikastolei babesa emanen liekeen legeari buruzko ildo batzuk ere aipatu ditu. Eskolen erreforman edo lurralde erreforman, Falloux legea-k inposatzen duen egoera gaindituko duen lege bat osatu behar dela dio. Eskola erreformaren karietara, hizkuntza gutxituen garapena sostengatzen duen diputatu talde batekin lanean ari dela erran du, legeari zuzenketak egiteko. Lege babesa lortu ahal izateko, Frantziako diputatuen «parte hartzea» behar dela uste du eta, oinarrian, ministerioaren edo gobernuaren «abegia» behar dela: «Lege duin bat behar dugu, 30 urte luze iraun duen hipokrisitik ateratzeko».

EEP, suprefetarekin Pauen

Bertze alde batetik, Frantxua Maitia EEPko presidentea Paueko prefetarekin eta Baionako suprefetarekin bildu da. Bien partetik jarrera «baikorra» atzeman duela adierazi du. Hendaiako ikastolaren kasuan, aterabide bat atzemateko borondatea helarazi diote Maitiari. «Gaurko lege koadroaren interpretazio hertsia ez da egokia ikastolen egoitzei lotu inbertsio proiektuen aztertzeko», erran du Maitiak. Gogora ekarri du hizkuntza politika publikoa 2004an ezarri zutela abian, Estatuaren partaidetzarekin. Horren helburua hiztun osoak sortzea da, eta Seaska da ardatz horretan eragile nagusietarikoa. Horregatik, Maitiak galdegin die eragile guztiak norabide berean joatea, eta ekiditea iraganeko behin-behineko egoera eta segurtasun eza inposatzen duen egoera.

Bi eskari zehatz egin dizkie Maitiak Estatuaren ordezkariei. Batetik, Hendaiako ikastolarentzako aterabidea atzemateko, eta, bertzetik, lege koadroa aldatzeko aterabidea aztertzeko, ildo hori funtsezkoa baita elkargoek edo erakundeek ikastolen lana diruz lagundu ahal izateko. Prefetak adierazi dio ez duela euskararen aldeko lana trabatu nahi; alderantziz, garapena sustatzeko, herriko etxeei oroitarazi diela haurren eskolatzean parte hartu behar dutela, bereziki herritik kanpo ikasten duten haurren garraio edo otorduetan.

Jean Jacques-Lasserre Pirinio Atlantikoetako senatariak bilera batera deitu ditu Ipar Euskal Herriko parlamentariak eta Seaskako kideak, heldu den astelehenerako. Eskola legean hizkuntza gutxituak sartzeko, lurralde elkargoa bere eskumenekin onartzeko eta Frantziak Europako hizkuntza gutxituen ituna sinatzeko, parlamentariek «estrategia komun» bat adostu behar dutela erran du.

Seaskaren mobilizazioa

Gaurko iragarria zuen elkarretaratzea atxiki du Seaskak, Baionako Euskaldunen plazan, 15:00etan eginen dute. Dolu gisa, beltzez jantzirik joateko eskatu diete euskaltzaleei. Ikastoletako presidenteak astelehen gauean elkarretaratu ziren, eta kontuan hartu zuten prefetaren adierazpena. Borondate onaren seinale, mobilizazio ildoa geldituko du Seaskak, gaurkoaren ondotik. Zehaztu dute horrek ez duela erran nahi administrazioaren eraso bat balego edo Hendaiako ikastolarentzat aterabide onargarririk lortuko ez balitz berriz mobilizazioak egingo ez dituztela. Egoera gainditzeko keinua egin du Seaskak, baina urratsak eskatu dizkie administrazioari eta gobernuari. Aldi berean, ikastolak hizkuntza politikaren ardatz direla oroitaraziko dute gaurko mobilizazioarekin.

Seaskari eta, oro har, murgiltze ereduetan ari diren eskola sistemei egokitutako lege ildoak aztertzen hasiak direla jakinarazi du Indok. «Gure pozerako, Capdeviellekin bildu garelarik ikusi dugu bere aldetik lege baten egokitzapena aztertzen hasia zela». Baionako diputatuak egindako lana eta Seaskak abiaturikoa gurutzatu zituzten bilkuran. Hainbat ildo aztertu dituzte, baina ez dituzte oraindik jendaurrean agertuko.

Seaskak badaki hizkuntza gutxituen aurkako jarrera sutsuak daudela Frantzian. Horiek ez aktibatzeko, «urrats diskretuak» egin behar direla erran du Indok. Erreforma handien garaia da Frantzian; Seaskari egokitutako lege bat koka daiteke hezkuntzaren erreforman, deszentralizazio erreforman edo Europako hizkuntza gutxituen itunaren berrespenean. Indok ez du horretan sakondu nahi. Diskrezioa hobetsi du, legearen lanketa errazteko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Makina bat lanean, atzo, A-15 autobidean, Leitza (Nafarroa) parean. ©Jagoba Manterola / Foku

Aurreikusi dute uholdeak izango direla Euskal Herrian

Berria

Jaurlaritzak Uholdeei Aurre Egiteko Plan Berezia aktibatu du. Nafarroa erdialdea alerta gorrian dago, eta Ipar Euskal Herrian alerta naranja aktibatu dute. 500-600 metro inguruko altueran ari du elurra.    

 ©BERRIA

PANDEMIA BATEN LEHEN KONPASAK

Arantxa Iraola - Gorka Berasategi Otamendi

Ofizialki 1981. urtean jakinarazi ziren oraindik izenik ez zuen eritasun batek eragindako lehenengo kasuak: orain lau hamarraldi. Hiesaren pandemiaren hasiera izan zen. Bereziki erasokorra izan zen lehen urteetan; botikarik ez zen, eta diagnostikatu eta urte gutxira hiltzen ziren paziente asko.

Bezeroak Iruñeko jatetxe bateko sarreran COVID-19 ziurtagiria erakusten, bazkaltzera sartu aurretik. ©IDOIA ZABALETA / FOKU

Atezainak Nafarroako jatetxeetako atarietan

Iker Tubia

Jatetxe handietan COVID-19 ziurtagiria eskatzen ari dira atzoz geroztik. Bezeroek prest eramaten dute, gehienek sakelakoan. Zenbait bazkari bertan behera utzi dituzte, eta beste batzuetara jende gutxiago azaldu da.

 ©BERRIA

Hiltzaile iheskorraren erradiografia

Ion Orzaiz

Urteetan, galdera ugari eragin ditu GIB birusak komunitate zientifikoan. 40 urteko ibilbidearen ostean, inkognita gehienei erantzuna ematea lortu du zientziak. Ohikoenetako batzuk bildu ditu BERRIAk.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.