Itzulinguruka ibili nahi eta etika bidean galdu

Hauteskunde kanpainako polemiketako bat da, Espainian bereziki, baina baita Hego Euskal Herrian ere. Eta egunek aurrera egin ahala, argiago geratzen ari da PPren komunikazio estrategiaren parte ere badela. Izan ere, Espainiako PPren zerrendaburu Miguel Arias Cañetek esandakoagatik barkamena eskatu duen egun berean, hark piztutako suari su eman dio Carlos Iturgaitz EAEko hautagaiak, emakumeen aurkako indarkeria arinkeriaz erabiliz, arerio nagusiari, alderdi sozialistari, kalte egiteko asmoz.

EH Bilduk ere ekarri du emakumeen eskubideen gaia kanpainara; abortu eskubidea aldarrikatzeko eta salatzeko genero indarkeria eta, oro har, «doktrina katoliko kontserbadorean» oinarritutako hezkuntza. Hori egin du ohartarazteko jarrera «ultrakontserbadoreak» gogortu egingo direla hauteskundeetatik indartuta ateratzen bada «eskuin muturra». Hitz horien bitartez koalizioak ez ditu PPko kideen adierazpenak berariaz erantzun. Baina bai azpimarratu du alderdi hori eta UPN «eskuin muturrekoak» direla, Opus Deiren «aliatuak». «Borroka feministari esker lortutako sexu eta ugaltze eskubideak hankaz gora jarri nahi ditu [PPk]. Finean, emakumeak obedientziazko posizioetan kokatzen gaitu berriro ere», esan du Maite Iturre hautagaiak, Iruñeko artzapezpikuaren egoitzaren aurrean.

Nahita edo nahi gabe

Nahita edo nahi gabe, joan den astean piztu zuten sua PPkoek. Elena Valenciano PSOEko zerrendaburuarekin telebistan izandako debatearen ondoren, Cañetek esan zuen «oso zaila» dela emakume baten kontrako eztabaida politiko batean parte hartzea, gizonak «nagusitasun intelektuala» erakusten badu irudi «matxista» eman dezakeelako «babesik gabeko emakume baten aurrean».

Adierazpen horiek baldintzatu dituzte kanpainako eztabaida gaiak Espainian, eta oihartzun handia izan dute nazioartean. Astebete geroago eskatu du barkamena Cañetek, COPE irrati kontserbadorean. «Audientzia handiko hedabide batean eskatu nahi nuen, ez mitin batean», esan du.

Baina egun berean, atzera egin eta Euskal Herrira ekarri du eztabaida Iturgaitzek. Cañeteren hitzen inguruan sozialistek agertutako erreakzioarekin «harrituta» azaldu da, eta haiei leporatu die soilik hitz egitea PPren zerrendaburuaren adierazpenen inguruan edota abortatzeko eskubideaz. Cañeteren hitzei buruz esan du politikagintzan ere «egun txarrak» izaten direla, eta onartu du haren hitzak ez direla «egokiak» izan.

Baina sua amatatu beharrean, isiotu nahi izan du Iturgaitzek, sozialisten aurka egiteko. Hala gogoratu du 1992. urtean Donostiako auzitegiak zigortu egin zuela Jesus Egiguren PSE-EEko presidentea, haren orduko emazteari tratu txarrak emateagatik. «Eta nik ez dut PSOEko emakumerik ikusi haren dimisioa eskatzen. PPri lezioak eman bai, baina etxe barruan leziorik ez», adierazi du Radio Euskadin.

Iturgaitzen hitzek izan dute erantzunik Ramon Jauregiren ahotan, baina modu desegokian hura ere; «epaiak dioenaren oso bestelako azalpena izan dezakeen gertaeratzat» jo baitu Egigurenen kasua. Adierazpen hori bumeran baten antzera erabili, eta sozialisten aurka jo dute PPkoek.

Hori nahita edo nahi gabe egin duten argitu ez, baina PPkoek agerian utzi dute erabiltzen ari direla gaia. Itzulinguruka ibili nahi eta etika bidean galdu badute ere.