Albistea entzun

Errobiko Festibala, 2013ko hiri pastoralari bidea irekitzeko tokia

Kontzertuak eta beste egingo dira gaurtik igandera bitartean Itsasun, jaialdiaren 17. aldian
Regis Gizavo Madagaskargo akordeoi jotzailea, kontzertu batean. Larunbatean joko du Itsasun.
Regis Gizavo Madagaskargo akordeoi jotzailea, kontzertu batean. Larunbatean joko du Itsasun. BERRIA / BERRIA

Igor Susaeta -

2012ko uztailak 19

Datorren urtean hiri pastorala egingo da Bokalen, Errobi ibaiaren itsasadarrean. Garai bateko siderurgia industriaren bueltan emandako borrokak gogoratuko ditu. Eta aurtengo Errobiko Festibaleko agitasmo anitzek, hain zuzen, pastoral horretatik edanen dute. Gaur hasi eta igandera bitartean egingo da jaialdiaren 17. aldia Itsasun (Lapurdi), eta kontzertu, ibilaldi, dantza emanaldi, hitzaldi, ikuskizun, ikastaro eta bestelako ekitaldi sortzaileei esker, Euskal Herritik Bretainiara edota Afrikara bidaiatzeko aukera egongo da hurrengo lau egunetan. Hartara, Ama lurretik hiri pastoralera... Hiri pastoral baten bideetan lelopean, Etiopia, Madagaskar, Bretainia eta Euskal Herriko sorkuntza lanak izango ditu oinarrian jaialdiak.

Beñat Axiari festibaleko antolatzaileetako baten ustez, «kontsumo hutserako kultura batekin konformatzen ez direnentzako» festibal aproposa da Errobikoa, «Kulturaren partaide eta aktore bilakatu ahal zarelako, sorkuntzarako delako». Gaur hasiko da jaialdia, 17:00etan, Sanoki aretoan, Pastorala, sorkuntza artistikoaren bide berriak denentzako sormen gune bilakatu al daitezke? hitzaldiarekin. Axiarik gidatuko du, eta Armand Gatti idazle eta antzerkigilea izango da gonbidatua. Gero, 19:00etan, toki berean, Patxi Laskarai argazkilariaren erakusketa irekiko dute. Laskaraik pastoraletako eta maskaradetako argazkiak jarriko ditu, eta horiek gune industrial eta modernoetan atera dituen aleekin erkatuko ditu.

Afaria egingo da 20:00etan, eta ondoren, 21:30ean, kontzertua hasiko da. Julen Axiari kantari eta perkusio jotzaileak osatu du egitaraua. Josean Artze, Itxaro Borda eta Agustin Zamoraren olerkiekin ondutako abestiak, euskal kantu tradizionalak, eta John Coltraneren edo Yoruba herriaren doinuak interpretatuko dituzte Axiarik eta bere musikari lagunek, besteak beste. Gainera, Chrysogone Diangouaya Kongoko dantzaria ere arituko da haiekin.

Beste hitzaldi batekin emango diote hasiera biharko egitarauari. 10:00etan, Elizaldian, pastorala izango dute berriro hizpide. Mixel Etxekoparrek eta Nicole Lougarotek gidatuta, zuberotarrek lehengo eta oraingo pastoralei buruz emandako lekukotasunei tira egingo diete. Arratsaldean, berriz, 14:00etan, Kafea zabalik ekitaldia egingo da, eta 15:30ean ibilbide artistikoei hasiera emango zaie; pixkat lehenago, 15:00etan, beste ibilbide bat proposatu da, haurrentzako. 17:00etan, Atharrin, hiru kontzertu egingo dira: Kako Cavalie (guembri) eta Pierre Thibaud (kontxabaxua) bikotea, Didier Lasserre (bateria jotzailea) eta Fabien Duscombs eta Sylvain Darrifourcq bateria jotzaile bikoa.

Iluntzean, berriz, 21:30etik aurrera, hiru kontzertu egingo dira Atharri aretoan. Aurrena Bretainiako Keravec anaiek, Erwanek eta Guenolek, joko dute. Gaita eta bonbarda doinuekin, ikusleak Bretainiako musika eta dantza giroan murgiltzea da haien asmoa. Ondotik, Pilotarhitza ikuskizuna egingo dute Mixel Etxekoparrek eta bere musikari lagunek. Musika, bertsolaritza eta dantza uztartuko ditu, ideia nagusi moduan pilota jokoa erabilita. Eta egunari amaiera emateko, Etenesh Wassie kantari etiopiarra igoko da oholtzara, laukote baten laguntzarekin.

Hurrengo egunean, hasteko, Elizaldian, 10:00etan, hitzaldia: Transmisio bizia. Arratsaldean ibilaldia egingo da haurrekin, baita Ibilbide artistikoak ere. Horietan, Maddi Oihanert kantari zuberotarrak parte hartuko du. 17:00etan, Atharrin, Julen Axiarik eta Ewan Keravecek joko dute aurrena, eta haien ondotik, Mylene Charrierrek Le Poeme sale Ferreira Gullaren liburuaren pasarteak irakurriko ditu ozen, J. Christian Irigoien soinu jotzailearen laguntzarekin.

Eta 21:30ean, festibaleko azken kontzertua. Philippe de Ezkurrak egituratu du, eta musikari talde batek Turkiako, Euskal Herriko, Portugalgo eta Brasilgo doinuetan barna egindako bidaiaren barne sentiaraziko du ikuslea. Ondotik, Regis Gizavo Madagaskargo akordeoi jotzailea arituko da, bateria jotzaile eta piano jotzaile batek lagunduta. Bere herrialdeko erritmo sorginduetatik hartzen du hauspoa Gizavoren akordeoiak. Igandean amaituko da aurtengo festibala. Arranomendiko ibilaldi poetikoa egingo dute, 10:00etan, artistek eta festibaleko partaideek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Aintzane Galardiren <em>Bakardadearen aintzira</em> poemarentzat Udane Ansak sortutako irudia. ©UDANE ANSA

Poemak urik gabeko itsasoei

Ainhoa Sarasola

Hainbat poetak Ilargiari idatzitako olerkiak biltzen ditu 'Mare' liburuak, ilustrazioz jantzita. Beste hainbat testu luzeagok eta abesti batek osatzen dute proiektua

Sara Azurza abeslaria, bere <em>Hemen berriro</em> diskoa aurkezteko argazki batean. ©ZART KOLEKTIBOA

Emozioak akordeen oinarrian

Miren Mujika Telleria

Sara Azurzak 'Hemen berriro' diskoa kaleratu du, Zart kolektiboarekin. Bizitzaren ziklo emozionala du ardatz diskoak. Askotariko musika estiloak tartekatu ditu kantuetan

Judith Jauregik hainbat konpositoreren obrak interpretatuko ditu jaialdian. ©BERRIA

Literatura izango du ardatz Bilboko Musika-Musica jaialdiak

Erredakzioa

Martxoaren 3tik 5era, 70 kontzertu egingo dituzte Arriaga antzokian eta Euskalduna jauregian. Festibalak 1.400 musikari bilduko ditu

Ruper Ordorika eta Joseba Sarrionandia, astelehen iluntzean, Bilboko Kafe Antzokiko Kutxa Beltza aretoan. ©ARITZ LOIOLA / FOKU

Gaur konta daitezkeen kantuak

Olatz Enzunza Mallona

Ruper Ordorika eta Joseba Sarrionandia askotariko gaiez solasean aritu dira 'Huntaz eta hartaz' emanaldian, elkarrekin izandako bizipenak ardatz hartuta. Astelehen iluntzean hasita, bihar arte egingo dituzte saioak, Bilboko Kafe Antzokiko Kutxa Beltza aretoan. Agortuta daude sarrera guztiak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...