«Nazio akordio estrategiko bat egitea dugu helburu»

Sortu legeztatuta edo ez, hurrengo bozetarako ere aurreko bietan egindako indar bilketaren aldeko apustua berretsi duzue. Luzera begirako apustua da, beraz?

Luzera begirako apustua da, bai, estrategikoa. Alde horretatik, guk argi daukagu Sortu legezko izan edo ez, eta espero dezagun legezkoa izango dela, hurrengo hauteskundeei heltzeko egingo dugun planteamendua parametro berdinetan joango dela.

Boz horien aurretik akordio estrategiko bat lantzea helburutzat duzue.

Akordio estrategikoa ez da hauteskundeei begirako planteamendu bat. Bilduren garaian ere esan genuen. Ezker abertzaleak aurretik akordio estrategikoa landu zuen Eusko Alkartasunarekin, eta geroago Alternatibarekin. Orain, hirurok bide luzeko eta edukiz betetako akordio bat daukagu. Amaiurren ez zen hori gertatu; beharrik ere ez zegoen. Beraz, orain, Amaiurreko kide Aralarrekin ez daukagu tankera eta sakonera horretako akordiorik. Orduan, helburuak izan behar du Aralarrekin, posible den neurrian eta haren barne egoerak ahalbidetzen duen neurrian, horrelako akordio bat lortzea. Halaber, logikoa da, orain Ipar Euskal Herrian ere esploratzea zer aukera egon daitezkeen Iparraldeko abertzaleak ere akordio estrategiko horren partaide izan daitezen.

Nazio akordio estrategiko bat lortu nahi duzue, beraz.

Hori da. Bide hori esploratzen ari gara, eta oraingoz norabide onean gaude. Baina aste batzuk gehiago beharko dira, batez ere alderdi batzuek barnean dauzkaten egoera batzuk konpontzeko edo konponbidean jartzeko aukera izan dezaten. Gisa horretako akordio bat izugarrizko akuilua izango litzateke, herri oso baten ikuspegitik egingo litzatekeen ezkerreko eskaintza abertzale, subiranista, independentista batez hitz egiten ariko ginatekeelako, eta horrek sekulako aurrerapena ekarriko lukeelako, izugarrizko hasiera horretatik aurrera gauzak norabide eraginkorretan kokatzeko. Hori hasiera gisa kokatzen dugu; ez da helburu bat, berez.

Hasi zarete akordio estrategikoa lotzen, edo laster hastekoak zarete?

Hitz egiten ari gara honetaz guztiaz ,eta bakoitzak zer barne egoera eta zer aukera duenn honelako helburu bati eutsi ahal izateko. Egoerak desberdinak baitira. Baina funtsezkoa da horrelakoetan, alderdi bakoitzaren erritmoak errespetatzea, presiorik gabe, erabakiak lasai har ditzaten.

Jaurlaritzara iristea izango da zuen erronka hurrengo bozetan?

Oso garai berezian datoz hauteskundeok. Egingo bagenu Bilduk edo Amaiurrek aurreko bozetan lortutako emaitzen proiekzio bat Gasteizko parlamentuan, lehia bizian egongo ginateke EAJrekin, bai boz kopuruan eta bai ordezkarietan ere. Erronka bat daukagu egin dugun jauzi instituzional horren barruan; ez da bakarrik eskaintzea eredu politiko eta sozial desberdin, aurrerakoi, abertzale eta independentista bat, baizik eta jendeari konfiantza nahiko ematea, guregan bakearen aldeko inbertsio indartsu bat ikus dezaten aurrerantzean ere, bai eta politika beste modu batez egin ahal izateko eskaintza bat ere. Ikuspegi horrekin joango gara bozetara, anbizioarekin, irabaztera eta eskuratzera, posible den neurrian, gobernu bat osatzeko beharrezko botoak.