Sanchez Muniain: «PSNrik gabe bizkorrago lan egiten dugu»

Bozeramaileak azaldu du eraginkortasunean irabazi duela Barcinaren gobernuak eta onurak igarriko direla

2012ko ekainak 28 - Iruñea

Bakarrik hobe. Hala dirudi Nafarroako Gobernuko bozeramaile eta bigarren lehendakariorde Juan Luis Sanchez Muniainen adierazpenak kontuan hartuta. PSNk koalizio gobernua utzi eta UPN bakarrik geratu ondoren, Yolanda Barcinaren gobernuak «abiadura handitu du». «PSNrik gabe bizkorrago lan egiten dugu», horixe Sanchez Muniainen ondorioa, gobernu berrituaren lehen bilera egin ostean. «Abiadura guztiz bizkorra antzeman dugu erabakiak hartzeko orduan», esan zuen bozeramaileak. UPN-PSN gobernu ituna krisian sartu eta azkenean hautsi den arte igaro diren asteetan «lanak pilatu» egin zaizkio foru gobernuari. «Orain erritmo biziagoa ezarri nahi dugu, eta gobernuan dugun kohesio handiago dugula, aprobetxatuko dugu».

Nafarroako bigarren lehendakariordearen iritzian, mesedegarri izango da erritmo bizkortze hori, eta herritarrek ere igarriko dituzte «onurak».

Asteburuan kontseilari berriak karguaren zina egin osteko lehen gobernu bilera egin zuten atzo. Han izan ziren izendatu berriak: Luis Zarraluki Sustapen kontseilaria, Jose Javier Esparza Nekazaritza Garapen, Ingurumen eta Herri Administraziokoa, Javier Morras Lehendakaritza, Justizia eta Barne kontseilaria eta Jesus Pejenaute Gizarte Politiketakoa.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Izan BERRIAlaguna