Etxebizitza, auto trafikoa eta enplegua ditu lehentasunetan Herri Berrik

Etxebizitza, auto trafikoa eta enplegua ezarri ditu lehentasunen artean Herri Berri Donibane Lohizuneko zerrenda abertzale ezkertiarrak, martxoko herri hauteskundeei begira. «Gure herriko gai minberatsuak dira, aspaldian agerian ezartzen ditugunak, izan kontseiluan izan herriko plazan», dio Paxkal Lafitte zerrendaburuak.

Atzo arratsaldean egin zuten zerrendaren eta programaren nondik norakoaren aurkezpena. 33 pertsonek osatzen dute zerrenda, eta horien artean ikus daitezke Daniel Labandibar Alderdi Sozialistako kidea eta Yvette Debarbieux Alderdi Komunistako kidea. Hautagaietako zortzi hautetsi edo hautetsi izandakoak dira. Bil Gaiten izpirituaren baitan kokatzen dute zerrenda.

Beste lan ardatz batzuk ere dituzte finkaturik: euskara, bake prozesua, Ipar Euskal Herriaren ezagupen instituzionala, hurbileko zerbitzu publikoak, demokrazia parte hartzailea eta garapen iraunkorra.

Peyuco Duhart Donibane Lohizuneko auzapeza (UMP) berriz aurkeztuko dela jakina da, eta parean ukanen ditu, besteak beste, sozialistak. Alderdi Sozialistak arratsalde honetan eginen du bozketa horiei buruzko prentsaurrekoa.