Albistea entzun

Kreditazioen zubian gora

Plaza giro

Zinemaldiak bere egiten ditu hiriko erdiguneko kaleak egunotan; Kursaala eta Maria Cristina lotzen dituen Urumeako zubia giro bereziaren adierazgarri da.
Kursaala eta Maria Cristina lotzen dituen zubian, lagun talde bat, kreditazioa eta Zinemaldiko poltsak gainean dituztela.
Kursaala eta Maria Cristina lotzen dituen zubian, lagun talde bat, kreditazioa eta Zinemaldiko poltsak gainean dituztela. XABIER MARTIN

Xabier Martin -

2011ko irailak 24

Zubian lasai-lasai aurrera doan inor asaldatu egin daiteke bat-batean: «Nik ez dut kreditaziorik lepoan». Maria Cristina hotela, Antzoki Zaharra eta Viktoria Eugenia antzokia Kursaalarekin lotzen dituen Urumeako zubia pasatzeko baimenik beharko ote? Zinemaldiak mikrokosmosa osatzen du egunotan, kazetari, epaimahaietako kide, filmetako arduradun, atezain, zerbitzari eta bestelako langileekin. Denek dute kreditazioa, eta gehienek lepoan zintzilik daramate, dela urdina, laranja edo beste kolore batekoa; Zinemaldian badirela inor adierazi nahian ariko ote dira, paseoan gora eta behera, sari hori erakusten? «Begira, erosotasun kontua da», dio Joan Garciak, Bartzelonatik etorritako kazetariak. «Filmetan sartzeko erakutsi behar dugu; Kursaalera sartzeko ere bai; Maria Cristinan elkarrizketa bat baduzu, hobe bistan eramatea. Zertarako kenduko duzu ba? Nik goizean jartzen dut, eta eguna bukatu arte ez dut kentzen».

Kreditatuen erresuma da Kursaal inguruko zubia. Antzoki Zaharreko filma ikusi eta bizi-bizi Kursaal aldera doaz batzuk; prentsaurrekoa ezin dute galdu. Kursaaletik Maria Cristina hotelera besteak, sail ofizialeko lehen filma ikusi ondoren. Elkarrizketa bat hitzarturik dute, seguru. Korrikalariak, bizikleta zaleak eta normalean eremua bere egiten duten beste ohiko oinezkoak bazterturik geratzen dira egunotan. Baina ez dute erraz amore ematen. Justo Albari bost axola glamour-a dagoenetz. Kanaberarekin ari da zubiaren erdian. «Ikusten al duzu poltsa?», galdetu du. Muxar txikiz beterik du. «Groseko arrantzale hoberena naizela esan». Zinemaldia noiz bukatuko zain dago, «lasaiago egoten baita». Baina, bitartean, ez da geratzen. «Erretiroa hartu dudanetik, egunero etortzen naiz; etxean ez dugu arrainik falta».

Poltsak eta argitalpenak

Haren bizkarrean gertatzen ari den horrek ez du merezi arrantzalearen arreta. Ez du ikusi ETBko aurkezle ezagunenetako bat bere kreditazioarekin zubian gora joaten. Zinemaldirako kreditaturik dauden 1.073 kazetarietako bat baino ez da, izan ere. Soka urdin eta laranja gehitxo daude. Noiznahi ikusten ditu euren argazkitxoa paparrean daramaten rara avis horiek. Erraza da oso: kazetariez gain, beste 1.800 pertsona daude kreditazioarekin —filmekin, ekoiztetxeekin edo bestelako elkarteekin dute lotura—.

Kreditazioa dutenek beste bereizgarri batzuk ere badituzte aldean sarritan. Zubian aurrera doaz Zinemaldiak argitaratzen duen egunkaritxoarekin. Zinemaldiaren poltsaren jabe direla argi ikus daiteke, era berean. Eta, taldeka doazenean, ikusi berri duten filmaren bertute eta akatsez dihardute, intelektualei dagokien moduan. Kinielak ez dira falta, are gehiago palmaresa gaur ezagutzera emango dutela jakinda.

Luma zorrozten ariko den kritikari ezagun bat azkar pasa da Bulebar aldera. Madrilen argitaratzen den egunkari batean dihardu, eta beteranoa da oso Zinemaldian. Ez du lepoan sokarik. Ez darama poltsarik; eta are gutxiago Zinemaldiaren argitalpenik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Olatu sinkronizatua

Berria

Bi urte barru Europako kultur hiribirua izateko bidean, bosgarren Olatu Talka lehertu da asteburu honetan Donostian, 250etik gora proposamen sinkronizatu eskainita parte hartu nahi duen orori. Sormena, kirola argazkian, Easo igeriketa taldeko kideen atzoko erakustaldia, aldarrikapena eta elkartasuna nahastu dira egitarauan. Donostiatik kanpo ere zabaldu da aurten eskaintza, gainera.

Alarmak piztuta

Berria

Nafarroan, berezko arraza batzuk galzorian

60 urteko gaztea

Berria

Fender Stratocaster gitarra elektrikoa, 1954tik doinuka

Hemen da Olentzero

Berria

Gaur kalez kale eta etxez etxe ibiliko da, haurren begiradapean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.