Kritika
Urte berriak eman onurak
Musika
Bilboko Orkestra Sinfonikoa
Zuzendaria: Roberto Mintzuk. Bakarlaria: Joaquin Atxukarro. Lekua: Bilboko Euskalduna jauregia. Eguna: Urtarrilak 13.
Urte berriak kontzertu mamitsua ekarri du Euskaldunara. Mintzuk-en zuzendaritza sendopean, BOSen suspertzeaz, Atxukarroren gorputzaldiaz eta Aurelio Edler-Copesen estreinaldi absolutuaz gozatu dugu. Oso atsegina iruditu zait brasildar konpositore gaztearen Gogoratzen ote du itsasoak nor dabilen bere gainean oinez? lan labur interesgarria. Erkoreka eta Lazkano euskaldunen ikaslea izanik, Edler-Copesek memoriaren eta itsasoaren arteko elkartzearen gaineko hausnarketa atonala egin du: hari instrumentuen soloak noizbehinka azaltzen dira soinu fondoaren artetik (perkusioa oinarrian), denboraren iragaitea hezurmamitzen duten agerpenak balira bezala, urratutako bidean agertzen diren oinatzak bezala, egilearen esanetan. Prozesu honetan, soinu lerro bakoitza lehertu egiten da azkenean kluster mugikor batean.
Kontzertuaren bigarren zatian, Joaquin Atxukarroren joaldi ona entzuteko parada izan genuen, Brahms-en pianorako 2. kontzertu erromantikoan... eta zailean. Sasoiko dago bilbotar maisua. Lehen mugimenduko gai pluralak modu distiratsuan eman zituen; bigarrenean, erritmoa eta azkartasuna erakutsi zituen eskala kromatikoetan edo arpegioetan; hirugarrenean, berriz, lirismoa tempo irregularretan; eta laugarrenean zehaztasuna eta intimitatea. Mintzuk-ek ondo orekatu zuen bakarlariaren koloretasuna. Baina orkestrak eta zuzendariak Prokofiev-en Romeo eta Julieta-ren suiteetako pasarteetan eman zuten onena.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.