Kontzertu indargabetua

Musika

BOSen Eguberriko kontzertua

Zuzendaria: Christoph Spering. Lekua: Euskalduna jauregia (Bilbo).

Eguna: Abenduak 16.

Mami handiagoko lanaren falta ikusi diogu Bilbao Orkestra Sinfonikoaren aurtengo Eguberriko Kontzertuari. Nahiz eta egitarauko konpositore gehienak primerakoak izan, eman dizkiguten lanak ez ziren ohiko sasoi honetan eman duten mailakoak. Hasierako G.F. Handelen Errege Su Artifizialetarako musika suitean, HWV 351, Spering zuzendaria bertsio historizistagoa ateratzekotan ibili zen: esaterako, ohikoan joten den baino abiadura gehiago eman zion erritmoari; gero nabarmendu nahi zituen instrumentu taldeak eta perkusioan bordoi-danborra sartu zuen tinbaletik aparte. Bilboko orkestrak ahaleginak egin arren, zuzendariaren atzetik ibili zen pasarte arinetan eta mugimendu horietan metalezko agudoek goietan haizeratu zuten afinazioa ez zen kalitatezkoa izan( hobeto legoke tronpeta barrokoekin?) eta gainera ezaguna da gelaren akustikak ez duela askorik laguntzen talde txikiaren kasuetan... Mozart-en Exultate,Jubilate ospetsuan, K. 158, Olatz Saitua Bilboko sopranoak afinazioa eta kantu teknika erakutsi zituen abesti zailean, bai jauzietan zein gurguiluetan edo fraseo lanetan. Baina uste dut nik ez dela ahotsik egokiena kantu horretarako: bolumen eta zabalkunde gehiago eskatuko genioke trantze horietan. Antzeko zerbait gertatu zen JS. Bachen Cantata BWV 51-an. Aitzitik, eder, etengabeko baxuarekin (txelo,kontrabaxua eta organo positiboarekin) abestu zuenean. Egitarauaren azkenetan, hau da, Max Reger-en Bariazioak eta Fuga Mozarten pieza baten gainean op.132-ean, entzun genuen Bilbao Orkestra Sinfonikoaren biribiltasuna, hots, lan erromantikoan eta sinfonikoan. Baina, maila apalago batean dagoen pieza erakargarrian. Beste aldetik, asko estimatzekoa da Speringen jakinduria eta entrega.