Albistea entzun

Sugarrak ezin itzali

«Irainean» eta «borrokan» iltzatuta egotea egotzi dio EAJk Sorturi, baina egoera normalizatzeko prest azaldu da.

Akordioa aldarrikatu du Sortuk
Andoni Ortuzar eta Hasier Arraiz, 2014ko urtarrilean presoen eskubideen alde egindako manifestazioan.
Andoni Ortuzar eta Hasier Arraiz, 2014ko urtarrilean presoen eskubideen alde egindako manifestazioan. RAUL BOGAJO / ARP

Aitziber Laskibar Lizarribar -

2015eko martxoak 20

Aurrez berotuta zegoen harremanean, sua eragin du txinparta batek. Ufadek sutea sortu dute, eta kostatzen ari da garrak itzaltzea. EAJk eta Sortuk muturka jarraitzen dute; errua elkarri egozten. Itxaso Atutxa EAJren Bizkai Buru Batzarreko presidenteak adierazi du, esate baterako, jeltzaleak herriaren onurarako akordio bila ari diren bitartean «beste batzuek berean» jarraitzen dutela, «sesioan, lokatzean eta irainean». Nori buruz ari den espresuki esan gabe, «zenbaitzuek borrokarako, nahasmenerako eta difamaziorako duten gogoa» gaitzetsi du Atutxak, Durangaldean EAJk aurkeztu dituen alkategaien berri emateko ekitaldian.

Hauteskundeei begirako agerraldi batean esan ditu horiek BBBko buruak, halakoetan izaten diren mezu erasokorragoekin. Baina erasoa apaldu ere egin du, «herria eraiki nahi duten guztiei» akordiorako eskua luzatua diela adierazita.

Ser irrati katean egindako elkarrizketa batean, argiago nabarmendu du urak bere bidera eramateko nahia. EH Bildurekin harremanak «normaltzearen» alde egin du. Areago: EAJ horrenbeste mindu duten Sorturen hitzen atzean «urduritasuna soilik» dagoen ustea azaldu du: «Fede txarra baino gehiago, urduritasuna ikusten dut nik». Hauteskundeen aurretik alderdi guztiek «tentsio uneak» dituztela ere esan du, liskarra nolabait arrazoitzeko.

Horrela, EAJren eta Sorturen arteko harremanak «hain txarrak» izango ez diren esperantza azaldu du buruzagi jeltzaleak, eta ez duela zertan etorkizuna baldintzatu adierazi.

«Ahal bezain pronto normalizatu behar da egoera hau», esan du Atutxak. Are gehiago, akordioa egiten saiatzearen aldeko apustua egin du, «hauteskunde aurreko garaian» egon arren, «herriak eta egoerak hala eskatzen dutelako». Sortu, berriz, beste modu batean saiatu da egoera apaltzen: isilik egonda.

Hain zuzen, bai EAJk eta bai Sortuk jendaurrean egindako adierazpenak izan dira iskanbilaren iturburua. «Ezker abertzaleak leialagoa izan behar du bere harremanean, EAJrekin akordioak nahi baditu», esan zuen Andoni Ortuzar EBBko presidenteak astearte gauean Onda Vasca irratian egindako elkarrizketa batean. «Ezin da egon goizean salaketa edo ikerketa batzorde bat aurkezten eta arratsaldean akordio bat eskatzeko deitzen».

«Ezkutukoak»

Ohar bidez erantzun zien hitz horiei Sortuk, biharamunean: «Badirudi EAJk bere jokabide irregularrak eta praktika ustelak ezkutatzeko eskatzen digula gatazkaren ondorioak konpontzeko akordioaren truke». Sortuk gatazkaren ondorioak gainditzeko akordioa nahi duela esan zuen, baina ez duela halakorik onartuko.

Erabat sutu zuen erantzunak EAJ, eta EBBk agiri bat kaleratu zuen: «Sortuk kazetariak eta hiritargoa engainatu nahi ditu». Bakea eta elkarbizitza finkatzeko egin dituzten elkarrizketetan EAJk ez duela halako baldintzarik jarri abisu eman, eta manipulatzea egotzi zion Sorturi. Sortuk, beste ohar batean, zehaztu zuen ez zuela berak bilera horietako edukirik aipatu, eta Ortuzarren hitzei emandako erantzuna zela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Enrique Maia Iruñeko alkatea. ©Iñaki Porto / EFE

Iruñeko alkatea arbuiatzeko adierazpena aurkeztuko du EH Bilduk

Berria

Adierazpen xenofoboak «daturik eman gabe» egitea eta «kolektibo oso ahulak jomugan jartzea» egotzi dio koalizioak Enrique Maiari.

Altsasuko gazteen alde egindako mobilizazio bat, 2019ko urrian. ©IÑIGO URIZ / FOKU

Estrasburgok ez du aintzat hartu Altsasuko auziko gazteek egindako salaketa

Gotzon Hermosilla

Auziak Europan izan zezakeen bide judiziala amaitu egin da. Gizarteak emandako babesa nabarmendu du Altsasu Gurasoak plataformak

<em>Mozal legearen</em> aurka egindako protesta bat, Iruñean. ©JAGOBA MANTEROLA / FOKU

Mozala nola kendu

Iosu Alberdi

Kongresuko Barne Gaietarako Batzordera iritsi da 'mozal legea' erreformatzeko proposamena. Indar parlamentarioen lana izango da orain aldaketen nondik norakoak eztabaidatu eta adostea.

EH Bildu eta PSE-EE bildu dira gaur, Bilbon ©Amaya Diaz-Emparanza

Anduezak adierazi du ez duela proiekturik partekatuko EH Bildurekin, ETA gaitzetsi arte

Oihane Puertas Ramirez

Anduezak uste du bi alderdiek zenbait herritan dituzten akordioak «puntualak» eta positiboak direla, baina ez du uste egoera egokia denik «pisuzko akordioak» egiteko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.