Tusk: «Gure interesen artean ez daude Mayren 'brexit'-erako ideiak»

EBren eta Erresuma Batuaren geroko harremanaz negoziatzeko gidalerroen zirriborroa aurkeztu du Europar Kontseiluko presidenteak. Merkataritza itun «nahiko anbiziotsua» eskaini du
JULIEN WARNAND / EFE Tamaina handiagoan ikusi

Ander Perez Zala -

2018ko martxoak 8

Eskaintza onartu ala utzi. Lerro artean irakurrita, mezu hori bidali zion atzo Donald Tusk Europar Kontseiluko presidenteak Theresa May Erresuma Batuko lehen ministroari, Bruselaren eta Londresen etorkizuneko harremana negoziatzeko gidalerroen zirriborroa aurkeztean. Mayk joan den ostiralean eskatu zion EB Europako Batasunari merkataritza harreman «zabal bat» adosteko etorkizunerako, baina Tuskek uko egin zion ideia horri, eta merkataritza itun «nahiko anbiziotsu bat» eskaini zion atzo, EBk Kanadarekin duenaren moduko ituna —CETA—. «Gure interesen artean ez daude Mayren brexit-erako ideiak», erantzun zuen Tuskek, Luxenburgoko lehen ministro Xavier Bettel alboan zuela.

Mayk ostiralean aitortu zuen Erresuma Batua merkatu bakarretik, ECJ Europako Justizia Auzitegiaren jurisdikziotik eta aduana batasunetik aterako dela brexit-a gauzatzean. Gaur-gaurkoz, Londresek lerro gorri horiei eusten badie, Bruselak irtenbide bakar bat ikusten du: «Tamalez, ondorio ekonomiko negatiboak izango ditu. Geratzen den modelo bakarra merkataritza itun bat da. Hau ez da ezusteko ondorio bat», ziurtatu zuen Tuskek. Ondasunen sektore guztiak kontuan hartuko lituzkeen itun bat proposatuko dio EBk Londresi, muga zergarik gabekoa. Horrez gain, zirriborroaren arabera, Bruselak beste hiru proposamen egingo dizkio Londresi etorkizuneko harremana negoziatzean: «terrorismoaren» eta nazioarteko krimenaren aurkako borrokan lankidetzak jarraitzea, EBren eta Erresuma Batuaren arteko hegaldien auzia lehenbailehen konpontzea, eta Erresuma Batuak Bruselaren hainbat programatan parte hartzen jarraitzea, hala nola hezkuntzan, kulturan, eta I+G ikerketa eta garapenean. Bettelek gaineratu zuen ez dela «garailerik» izango: «Ez dugu Erresuma Batua zigortu nahi. Brexit inteligente bat behar dugu».

'Cherry-picking'-ik ez

Tuskek esaldi batean laburbildu zuen ondorio ekonomikoen eragina: «Harreman ekonomikoak hobetu beharrean okertuko dituen historiako lehen merkataritza ituna izango da. Hori da brexit-aren esentzia». Mayk ostiralean proposatu zion Bruselari oraingo harremanei eustea sektore batzuetan, eta kontrakoa egitea beste batzuetan; cherry-picking deitzen diote nahi horri. Brusela, ordea, ez da ideia horren aldekoa: «Estatu kidea ez den herrialde batentzat guztiz baztertuta dago aukera hori. Ez ditugu printzipio horiek sakrifikatuko», gogorarazi zion Tuskek Mayri.

Hil honen bukaeran, martxoaren 22an eta 23an, bilera bat du Europar Kontseiluak, eta han negoziatuko dituzte 27 estatu kideek atzoko gidalerroak —Bettelek iragarri zuen baiezkoa emango diela—. Horren zain dago Londres, lehen ministroaren bozeramaile baten arabera: «Behin betiko gidalerroen zain gaude. Espero dugu Erresuma Batuak nahi duen malgutasuna eskainiko dutela». Oraingoz, Mayren itxaropenak izoztu ditu Tuskek.

Luxenburgoko prentsaurrekoa amaitu eta gutxira mintzatu zen Philip Hammond Erresuma Batuko Ekonomia ministroa, finantza zerbitzuez; hain justu, zirriborroak ez du hitzik gai horretaz. «Gidalerroak gogorrak dira. EBk eta Erresuma Batuak interes komun bat dute finantza zerbitzuak etorkizuneko itunaren parte izateko», ohartarazi zuen Hammondek. Londresek oraindik aukera du bere proposamenak eta lerro gorriak aldatzeko, eta hori badaki Bruselak. Horregatik, zirriborroak dio EBk denbora emango liokeela Londresi bere ideiak aldatzeko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Zarauzko (Gipuzkoa) hondartz, ekainean. ©Juan Carlos Ruiz / FOKU

Zarauzko Talai Mendi kanpinean PCR probak egiten dabiltza, bezero ohi batek positibo eman ostean

Amaia Ramirez de Okariz Kortabarria

Langileei PCR probak egin dizkiete, eta etxera bidali dituzte. Bezero batzuei ere egin dizkiete probak. Emaitzak jaso bitartean kanpinera inor ez sartzeko ez ateratzeko eskatu dute.

Parke bat hutsik, iragan apirilean, Bilbon. ©Luis Tejido / Foku

Bilboko udaleku batzuetan positibo bat atzeman dute, eta 38 lagun bakartu dituzte

Berria

Haur bati COVID-19a detektatu diotela-eta, haren kideek, begiraleek eta horien guztien bizikideek hamar egun igaro behar dituzte etxean, bakartuta.

Hainbat herritar, Iruñean, maskara jantzita. / ©Iñigo Uriz, Foku

Maskarak erabiltzea derrigorrezkoa izango da Hego Euskal Herrian

Joxerra Senar

Araban, Bizkaian eta Gipuzkoan, bihartik aurrera kalean ere jantzi beharko da maskara; Nafarroan, etzitik aurrera. Igerilekuetan eta hondartzan, maskara jantzi beharkoa da, bainua hartzeko izan ezik. Kirola egiteko orduan edo naturguneetan ken daiteke. Jaurlaritzak botila festa debekatu egin du.

Herritarrak PCR proba egiteko zain. ©Jon Urbe / Foku

80 kasu gehiago Hegoaldean, eta lehen hildakoa Nafarroan ekainaren 11tik

Edu Lartzanguren

Gipuzkoan indarrez ari da izurria: 41 kasu baieztatu dituzte. Iruñean beste agerraldi bat atzeman dute, eta gutxienez hiru lagun kutsatu dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna