Albistea entzun

Izpi moreak Errekalden

Irailean lau urte beteko dira Kukutza eraitsi zutela. Orain, Bilboko Errekalde auzoko bizilagunek auzokide berriak dituzte: hainbat emakume feministak eraikin huts bat okupatu dute bertan.
Egitasmo okupatzaile, autogestionatu eta feminista da OihuK eraikina. Irudian, barruko txoko bat.
Egitasmo okupatzaile, autogestionatu eta feminista da OihuK eraikina. Irudian, barruko txoko bat. BERRIA

Alaitz Armendariz -

2015eko abuztuak 8 - Bilbo

Joan den ekainaren 27ra arte, Bilboko Entrecanales kaleko 4. zenbakiko eraikinak hainbat urtez hautsa eta zikinkeria pilatzeko baino ez du balio izan. Egun, ordea, OihuK deitutako espazioa bizitasunaz betetzen hasi da, Errekalde auzoan. Hainbat emakume feministak eraikin industrial hori okupatzeko asmoa zerabilten aspalditik, eta, azkenean, gauzatu egin dute. Egitasmo okupatzaile, autogestionatu eta feminista horren bidez, emakume, bollera, trans eta feministek euren «beharrei» erantzuteko espazio bat sortu nahi dute. Inguruan feminismoa praktikan jartzeko espazio aproposik ez baitago, azaldu dutenez: «Gabezia asko dago Bilbon eta Errekalden, bai emakumeentzat, bai feminismoarentzat».

Euskal Herrian ez da egitasmo feminista horrekin alderatu daitekeenik. Ideia «kanpotik eta feminismotik bertatik» etorri dela argitu dute proiektuaren bultzatzaileek. Etorkizunera begira oso baikor azaldu dira: «Aurrerapauso handi bat egiten ari garela iruditzen zaigu. Gu hemen hau egiteko gai bagara, agian animatuko dira txoko gehiagotan ere. Hori da asmoa». Bilboko mugimendu feminista antolatuak luze darama emakumeentzako etxe bat eskatzen, baina ez du erakundeen aldetik ezer lortu. «Horretan ere pentsatu genuen: ez digutela eskatzen duguna ematen? Bada, guk hartuko dugu, eta datorrena datorrela». Halere, espazio horretako ekinbidea oso «askotarikoa» da, eta, beste talde antolatuetako emakumeek parte hartu arren, independentea da erabat.

Lan handia dute aurretik. Inaugurazio ofiziala egingo dute gaur, baina horretarako jo eta ke aritu dira azken asteotan, lau solairuko eraikina atondu eta garbitzen. Bigarren solairua prest dago. Uda izanik ere, emakume asko laguntzera gerturatu dira, eta irailetik aurrera dena prest edukitzea espero dute. Dena den, oraingoz ez dute zehaztu zein jarduera egingo duten: luze hitz egin beharra daukate, ideiak elkarri azaldu, eztabaidatu. Espazioa oso handia da, eta horrek «aukera asko» ematen ditu.

Bisitarien «aniztasuna» ere garrantzitsutzat jo dute. Izan ere, adin guztietako emakumeak batu dira ekinbidera. Adina ez ezik, andreen jatorria ere askotarikoa da: batzuk feminismotik heldu dira; beste batzuk, okupazio mugimenduetatik... «Oso arlo desberdinetako emakumeak biltzen ari dira, feminismoari lotutakoak edo ez, eta hori oso aberasgarria da». Astero jende berria joaten dela diote, eta oso harrera ona eduki dutela. «Bete-betean asmatu dugula esaten digute».

Herritarren laguntza

Auzokideekin harreman ona izatea espero dute. «Okupazioaren estigma hor dago, nahiz eta agian Errekalden auzo bizitza egitera ohituago egon», azaldu dute. Dena dela, oso pozik daude, laguntza handia jaso dutelako. «Nahiz eta harremanik ez izan, hainbat herritar ezezagunek laguntzeko material asko ekarri digute; margoak, lanparak... Gauzak ondo egiten ari garen seinale».

Nabarmendu dutenez, espazioa ez da mistoa: andreentzat soilik izango da, «segurtasun espazio bat» sortzeko, sexismorik gabea. Ez hori bakarrik: «Egiteko modua ere aldatzen da». Adibidez, lanbideetan: «Elektrikariak behar ditugunean, askotan gizonengana jotzen dugu. Honelako espazio batek kontrakoa egitera behartzen gaitu; emakumeak bilatzera. Beharra sortzen dugu gure artean». Galdera bota dute horren harira: «Espazioa mistoa balitz, arituko ote ginen emakumeok horretan?». Hala, Euskal Herriko ingeniari industrial, iturgin, elektrikari... andreei batzeko eta laguntzeko deia egin diete.

Nahi bai, baina oraingoz ez dute jabeekin hitz egiterik lortu. Hilabete pasatxo daramate bertan, baina haiei denbora gehiago igaro dela iruditzen zaie, aurreratu duten guztiagatik. Esperientzia «oso ona» izaten ari da, eta luze irautea espero dute. «Oraingoz, taldea egina dago, eta ideia hor dago. Erakutsi dugu ahal dela, eta behar dugula. Ilusio handiz gaude; bizirik gaude».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Moderna txertoaren bi bial. ©Guillaume Fauveau

Moderna txertoa baizik ez dute jarriko Iparraldeko txertaketa guneetan

Oihana Teyseyre Koskarat

Eskualdeko Osasun Agentziak erran du «dosien kontserbazioagatik» hartu duela erabakia. Pfizer txertoaren dosi bat jarri behar dutenek eta 30 urtetik beherako herritarrek osasun langile independenteengana jo beharko dute hemendik aitzina.

Ziburun hildako hiru migranteen heriotzak salatzeko protesta ©Guillaume Fauveau

Ziburun trenak harrapatuta zaurituriko etorkinak eta hiru elkartek salaketa jarri dute

Oihana Teyseyre Koskarat

Nahi gabeko hilketagatik, bizia arriskuan jartzeagatik, nahi gabeko zauriengatik, eta pozoitzeagatik jarri dute salaketa Cimade, Anafe, eta Gisti elkarteek, istriputik zauriturik atera zen etorkinarekin batera.

Marifran Aranjuelo. / ©Maialen Andres, Foku

«Gezur asko esan dizkigute metroari buruz»

Unai Zubeldia - Gipuzkoako Hitza

Donostiako metroaren aurkako borrokak eta migratzaileen eta presoen aldekoak bizi dute, gaur egun, Aranjuelo. Ez zaio batere gustatu Donostiak azken urteotan izan duen eraldaketa.

Jatetxe bateko zerbitzaria, atzo, Donostian, bi bezeroren COVID ziurtagiriak egiaztatzen. ©JON URBE / FOKU

Ostalariek ez dute polizia (ere) izan nahi

Maddi Ane Txoperena Iribarren Ane Eslava

Atzotik, Euskal Herri osoan da indarrean COVID ziurtagiria. Araba, Bizkai eta Gipuzkoako 50 lagunetik goitiko jatetxeetako langile eta bezeroek egun batetik bertzera egokitu behar izan dute neurrira

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.