Albistea entzun

Eraldaketaren aitzin dasta

EHZ Nomada ekainaren 29tik uztailaren 1era eginen da, Baigorrin, Baionan eta Itsasun. Trantsizio urtea da aurten. Ekainaren 23ko biltzarrak finkatuko ditu norabide berriak. Bideoa albistearen bukaeran.
Yassassin talde ingelesa izango da EHZ Nomadan parte hartuko dutenetako bat.
Yassassin talde ingelesa izango da EHZ Nomadan parte hartuko dutenetako bat. BERRIA Tamaina handiagoan ikusi

Nora Arbelbide Lete. Ekhi Erremundegi Beloki -

2018ko maiatzak 31 - Baiona

Ekaineko azken asteburuko ohiko hitzordua ez galtzeko, baina aldi berean EHZ trantsizio batean dela azpimarratuz, horra nondik datorren aurtengo EHZ Nomada. Hiru egun, hiru herri, musika, zirku, antzerki eta dantza artean. Baigorritik Baionara. Afixaburuen lehian sartu gabe. Artetik errateko, hiru leku horiek teilatu indartsukoak izanen dira nagusiki. Iazko aro txarraren mamuaren beldurra oraindik hor dutela, aldi honetan euriaren ondorioen saihesteko aukerak aztertu dituzte, dela biltoki, ezker pareta edo ostatu, nahiz eta larunbat gaueko Baionako musika hitzordua karpapean izan.

Hasteko, ekainaren 29an, ostiralarekin, EHZ Nomadak Baigorriko Plaza Xokon du hitzordua. EHZ ez dela soilik musika kontu bat erakusteko asmoz, antzerkian eta dantzan jarriko du arreta. Baionako Etxepare lizeoko ikasleen antzerki taldeak Ero emateaz gain, Huts Teatroa Hozkailua-rekin iritsiko da, eta Kukai dantza taldea Gelajauziak emanaldiarekin izango da. Gaualdia musikarekin bururatuko dute, Garazi inguruko Doctor Mephisto taldearekin. Dozena bat musikari eta kantari biltzen ditu talde horrek, soul, blues eta rock munduko erritmoen munduan murgiltzen dena.

Biharamunean, ekainaren 30ean, larunbatarekin, EHZk Baionako bidea hartuko du, hortaz. Baiona Ttipiaren atarian dauden harresi ondoko Mousserolles izeneko belargunean karpa jarriko du, eta EHZk Baiona Ttipiko ostatuekin elkarlanean karriketan gaindi zabaltzekoa du bere erritmoa. Horretarako, poteo giroko ibilaldia dute pentsatua. Lagun, Eonian txaranga, Dr Troll magoa, Kongoko erritmoko dantzak, eta baita Biarritz Dance Schoolen hio-hopa ere. Lumi taldea ariko da Mami Txula ostatuan. Kalostrape ostatuan, berriz, Jon Iraundegik kontzertuetan hartu argazkien erakusketa jarriko dute. Eguneko programazioa Carcassonneko Barolosolo zirku konpainiaren akrobaziekin borobilduko dute. EHZ arrastirian joanen da karpara. Londresko Yassassin taldearen rocka entzuten ahalko da bertan, eta baita Casey rap abeslari frantsesa ere. EHZk jadanik ezagutzen du haren rap sarkorra, 2013ko edizioan etorri baitzen Lekornera. Arrastiria Kolinga bikotearen afro folkarekin hasiko dute. Ondotik, Pelax artista arituko da bere taldearekin. Gaua Zizpa gaztetxean bururatzekoa dute.

EHZk Itsasun du iraganen uztailaren lehena, igandea; Atharri ezker paretan, zehazki. Ohiko EHZn bezala, Euskal Herriko Laborantza Ganberak zikiroa prestatuko du egun horretan. Chicken Street konpainia eta Arberoako txaranga hor izanen ditu, animaziorako. Atx Teatroa eta Elirale dantza konpainia ere joango dira Itsasura. Kontzertuen aldetik, Foisis Jaunak karaoke bat proposatzekoa dute, taldearen zuzenekotik landa. Ondotik, Goxoki gaztetxera joatekoa da EHZ, eguneko ordu txikietaraino.

Baina hori; EHZ hau trantsiziozkoa da. Iaz, urteetako gorabeheren ondotik, EHZkoek 2017ko edizioa deuseztatu eta jaialdiaren etorkizunaz eztabaidatzeko aroa zabaldu zuten. Negua diagnostikoa egiteko erabili zuten, eta ideia anitz atera ziren hortik. Besteak beste, helburuak eta balioak ez direla argi, egoera ekonomikoaren karga, musika taldeen eskaintzan eta gazteen ohituretan izan diren aldaketak… Laguntzaileetan eta elkarlanean oinarrituta, parte hartzaileek urtero gazteen arteko harremana sustatu eta eskaintza kultural zabal bat eskaintzea ere baloratu dute. Hortik, erronka nagusiak definitu dituzte. Lau ildo nagusi dituzte adostu. Euskararen eta euskal kulturaren zabaltzea, erdaldunentzat ate ireki bat izatea, alternatiba iraunkorrak eraiki eta gauzatzea, eta militante aktiboen arteko truke eta topaketa gune izatea.

Lau erronka horiek kontuan hartzen dituzten proiektu berrien pentsatzeko eta proposatzeko garaia da orain. Edonork egiten ahalko ditu proposamenak, baldin eta proiektua gutxienez hiru pertsonaren artean pentsatua bada. Horri begira, lanegun bat antolatu dute Hazparnen (Lapurdi) larunbat honetako, EHZk duen egoitzan. Nahi dutenen artean proiektuak idatzi eta denen artean koadro bat ematea da lan egunaren xedea.

Ekainaren 23rako dute finkatua proiektuaren hautatzeko eguna, EHZk biltzar nagusia baitu egun horretan. Proiektu bat bozkatuta, oraino izanen dute zer zehaztu: barne antolaketa bera, aurrekontuen gaia, eta beste. Udan aritzekoak dira azken fase hori zehazten. Koadro horretatik, gero, asmoa da ikasturte hasieratik hastea lanean, 2019ko ekitaldia marrazten.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

 ©MARISOL RAMIREZ / FOKU

Aurtengo Durangoko Azokak argitu dezakeen argazkia

Itziar Ugarte Irizar

Digitalizazioaren aroak galdera ikur handiak ezarri ditu musikagintzaren sektorean. Nabarmen aldatu da musika banatzeko era, eta Durangoko Azokan ere gero eta begi-bistakoagoa da hori. Eredu bat agortzear sumatu arren, formatu fisikoaren aldeko jarrerari eusten diote gehienek.
Mona Hatoum artistaren <em>Still Life</em> instalazioa, Donostian. ©GORKA RUBIO / FOKU
Karmele Mitxelena eta Iñaki Cid Larrea, beren lan argitaratu berriak eskuetan, Donostian. ©GORKA RUBIO / FOKU

Karmele Mitxelenaren eta Iñaki Ciden lanak argitaratu dituzte

Itziar Ugarte Irizar

'Haragizko mamuak' du izenburu Mitxelenaren lehen narrazio liburuak, eta 'Behin batean Loiolan' antzerkiaren alorreko Ciden lanak. Donostia Hiriko Kutxa Literatura sariak irabazi dituzte biek, eta Elkarrek eman ditu lanok argitara.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...