Historian kantugintzarako iturria bilatu du lehen ere Joseba Tapia musikariak. 1936ko gerrako doinuak berreskuratu zituen Agur Intxorta maite diskoan, 2001ean, eta Karlistadetakoak Eta tira eta tunba lanean, 2010ean. Oraingoan, Duesoko presondegitik (Espainia) gudari batek idatzitakoak erabili ditu, Tximela kapitainaren izarrak lanerako. Soinu txikia albora utzita, gitarrarekin dabil orain Tapia.
Luis Rezola Arana izenarekin jaio zen 1914ean, gero Tximela kapitaina bihurtuko zen tolosarra. Bertsozale zen nerabezaroan, baina 22 urte eskas zituenean jo zuten faxistek altxamendua. Eusko Gudarostean sartu zen, eta Gorbeian, Oizen, Gernikan eta Bilbon ibili zen borrokan. Luze gabe, kapitain izendatu zuten gudarien arteko izardunik gazteenetakoa. Duesoko espetxean preso, sufrimenduari hitzak jarri zizkion Tximelak.
Tapiak musikara eraman nahi izan du egoera gogor haren zirrara. Espetxeko paretak bezain gordin eta biluziak dira kantak. Tapiaren ahotsa eta gitarra, Luis Fernandezen biolontxeloa eta Jexux Aranbururen teklatuak gehitu dizkio. Eta horrenbeste minen ondoan, umorerako aukera ere ematen dute Tximela kapitainaren hitzek, esaterako, Jueza eta ni abestian, frankisten epaiketa militarren ingurukoan.
JARDUNALDIA
Noiz. Gaur, 21:00etan.
Non. Lugaritz kultur etxean, Donostian.
Tapia, Duesoko kantutegian
Luis Rezola gudariak espetxean sorturiko kantak bildu ditu Joseba Tapiak, eta gitarraz joko ditu gaur Donostian
Iruzkinak
Ez dago iruzkinik
Ordenatu
