Albistea entzun

Korsikako nazionalisten eskaera nagusien aurka agertu da Macron

Korsikeraren koofizialtasuna eta egoiliar estatusa Frantziako Konstituzioaren aurkakotzat jo ditu Frantziako presidenteak. Pe A Corsicako diputatuek «preso politikoen» sakabanaketa kritikatu dute
Jendea Korsikako banderak astintzen, hauteskunde kanpainako Pe A Corsica koalizioaren ekitaldi batean, azaroan.
Jendea Korsikako banderak astintzen, hauteskunde kanpainako Pe A Corsica koalizioaren ekitaldi batean, azaroan. OLIVIER SANCHEZ / EFE Tamaina handiagoan ikusi

Iosu Alberdi -

2017ko abenduak 28

Pe A Corsicak nagusitasunez irabazi zituen Korsikako hauteskundeak, abenduaren 10ean. Femu A Corsica autonomistak eta Corsica Libera independentistak osatutako koalizioak bozen %56,5 lortu zituen. Frantziako presidente Emmanuel Macronek, ordea, koalizioaren helburu nagusietako biren aurka egin du.

«Posible da aldaketak egitea, baina esparru baten barruan, Frantziako Konstituzioarenean. Esparru horrek ezin ditu hainbat erreibindikazio bete: adibidez, egoiliar estatusa eta korsikeraren koofizialtasuna», adierazi zuen Frantziako presidenteak El Mundo egunkariak argitaratu eta berri agentziek zabaldutako elkarrizketan.

Nazionalistek uko egin diote epe motzera independentzia lortzeari, eta autonomia lortu eta garatzea ezarri dute datorren hamarkadarako helburutzat. Garapen horren barruan kokatu dituzte Macronek ezinezkotzat jo dituen bi puntu horiek.

Korsikera pixkanaka normalizatzen ari da politikan, eta politikari nazionalistek jada erabiltzen dute legebiltzarrean eta euren esku dauden udaletan. Testu ofizial ugari ere bi hizkuntzatan argitaratzen dituzte. Koofizialtasuna emateko, ordea, konstituzioa aldatu beharko litzateke, eta horrek bretoiei eta euskaldunei bidea irekiko lieke eskaera bera egiteko.

Egoiliar estatusa, berriz, hango biztanleen eskubideak bermatzeko neurri gisa aurkeztu dute hauteskunde kanpainan. Korsika Frantziako eskualde pobreenetako bat da, eta hango herritarrek uhartera joaten diren frantziarrekiko lehentasuna izatea du helburu, besteak beste, jabetza pribatuak eskuratzeko orduan. Horrela, etxebizitzen espekulazioaren aurka borrokatu nahi dute.

Hauteskundeetako garaipenarekin batera, Frantziako Barne ministro Gerard Collombek adierazi zuen Paris prest zegoela nazionalistekin elkarrizketak hasteko, «korsikarren eskaera ugariei aurre egiteko». Orduan, Gilles Simeonik, Pe A Corsicako zerrendaburuak, «adeitasunezko protokolotik» haratago joateko beharra adierazi zien: «Benetako elkarrizketa bat espero dugu estatuarekin».

Orain, ordea, marra gorriak finkatu ditu Macronek, eta kolektibitate berriaren zereginak ongi funtzionatzea jarri du helburutzat, «irlaren garapena bermatzeko». Izan ere, 2018tik aurrera kolektibitate bakarra osatuko dute Korsikan, orain arte indarrean zeuden bi departamenduak batuz.

Presoen gaia mahai gainean

Macronek, ordea, ez dio aipamenik egin Korsikako nazionalisten beste eskaera nagusietako bati, Frantzian espetxeratuta dauden «preso politiko korsikarren» itzulerari. «Presoentzako eta iheslarientzako amnistia beharra dago. Urte luzez, Parisek uko egin dio gaiaz hitz egiteari. Orain, berriz ere, mahai gainean dago», azaldu zuen Corsica Libera alderdiko buru Jean Guy Talamonik, hauteskundeetako garaipenaren ostean.

Orduan, Youssef Badr Frantziako Justizia Ministerioko bozeramaileak uko egin zion amnistiaz hitz egiteari, baina presoen gerturatzea aztertuko dutela azaldu zuen, «euren senideei bidaia garesti eta zailak saihesteko». Izan ere, FLNC Korsikako Nazioa Askatzeko Fronteak, uharteko talde armatu nagusiak, 2014an erabaki zuen armak uztea.

Nazionalistek behin eta berriz egin duten eskaera da presoena. Aurreko astean Pe A Corsicak Frantziako Asanblea Nazionalean dituen hiru diputatuk Fleury-Merogisko espetxea bisitatu zuten, presoen gerturatzea eta amnistia eskatzeko. Urtarrilean, Meauxko, Fresnesko eta Villepinteko kartzelak ere bisitatuko dituzte.

«Korsikarrak preso dauden instituzio horietara egiten ari garen bisitak zabaldua dagoen eskaera bat azpimarratzea du helburu, zatiketa politikoetatik haratago: presoen gerturatzea», adierazi zuen Paul Andre Colombani diputatuak. Lege arrunta aplikatu beharra ere aipatu zuen, «familien mesederako».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Erreskatea, Diyarbakirren.

5.000tik gora dira oraingoz Ekialde Hurbileko seismoetan hildakoak

Arantxa Elizegi Egilegor - Mikel O. Iribar

Gau osoan zehar lanean jarraitu dute erreskate taldeek, baina toki askotan laguntzaren zain daude oraindik. Ohartarazi dute biktima kopurua handitu egingo dela datozen orduetan. Milaka dira kaltetuak, eta 20.000tik gora zaurituak. Erdoganek hiru hilabeteko larrialdi egoera ezarri du hamar probintziatan.

«Herrialdearen historiako lurrikararik okerrena izan da hau»

«Herrialdearen historiako lurrikararik okerrena izan da hau»

Orsola Casagrande

Kurdistanen krisi mahaia eratu du HDP alderdiak, laguntza kudeatu eta kaltetutako eremuetara iristeko. Aterpeak lortzea da orain lehentasuna Sancarrentzat.

Greziako kostazainen ontzi bat, artxiboko irudi batean. ©HELLENIC COAST GUARD / EFE

Gutxienez hiru migratzaile hil eta hogeitik gora desagertu dira Lesbostik gertu

Mikel O. Iribar

Kostazainek hamasei pertsona erreskatatu dituzte. Bizirik atera direnen esanetan, haien ontzia haitzen aurka jo ostean hondoratu da.

Palestinar bat astelehenean Jeriko hirian izandako tiroketen arrastoei begira. ©EFE

Israelgo armadak adin txikiko palestinar bat hil du tiroz

Berria

Gazteak haien kontra tiro egin zuela adierazi dute armadaren iturriek. Urte hasieratik gutxienez 42 palestinar hil ditu Israelek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.